Densaýlyq saqtaý mınıstri Ajar Ǵınııat elimizdegi dári-dármek óndirisi týraly aıtty, dep habarlaıdy Egemen.kz.
«Jalpy, elimizde farmasevtıka salasynda óndiris kóleminiń óskenin atap ótken jón. 2021 jyly farmasevtıka ónerkásibi oń serpin kórsetti, bul rette farmasevtıkalyq ónimniń kólemi 2020 jylmen salystyrǵanda 124%-dy quraıdy. Bıylǵy qańtar-sáýir aılarynda farmasevtıkalyq ónim kólemi ótken jyldyń osy kezeńimen salystyrǵanda 5% ósti», dedi Ajar Ǵınııat Úkimettiń kezekti otyrysynda.
Onyń aıtýynsha, bul ósim «Hımfarm» AQ, «Nobel AFF» AQ, «Abdı Ibragım GlobalFarm» JShS, «Kelýn-Kazfarm» JShS óndiristik alańdarynda dári óndirisi kóleminiń ósýimen baılanysty.
«Qazaqstanda farmasevtıka ónerkásibi memlekettik qoldaýdyń arqasynda tıimdi ınvestısııanyń úlken áleýetine ıe boldy. Osylaısha, otandyq taýar óndirýshilermen memlekettik qoldaýdyń arqasynda 10 jylǵa uzaqmerzimdi sharttar jasaldy. Ol satyp alý úlesin aqshalaı mánde 2010 jyly 15%-dan 2021 jyly 41%-ǵa deıin ulǵaıtýǵa múmkindik berdi», dedi Densaýlyq saqtaý mınıstri.
Densaýlyq saqtaý mınıstrligi otandyq óndirýshilerge qoldaý kórsetý úshin birqatar shara qabyldaǵan. Pandemııa kezinde otandyq dárilik zattar men medısınalyq buıymdardyń qaýipsizdigi men sapasyna baǵalaý júrgizý jáne otandyq dárilik zattar men medısınalyq buıymdardyń tirkeý saraptamasy jedeldetildi. Uzaqmerzimdi sharttar jasasýǵa ónim berýshilerdi irikteý ólshemsharttary qaıta qaraldy. Uzaqmerzimdi sharttardy oryndaýǵa monıtorıng júrgiziledi.
Biryńǵaı dıstrıbıýtor 37 otandyq taýar óndirýshimen 5 myńnan dárilik zattar men medısınalyq buıymdardy (811 dárilik zat jáne 4 196 medısınalyq buıym) jetkizýge 96 uzaqmerzimdi shart jasady.
Onyń ishinde dárilik zattarǵa - 43, medısınalyq buıymdarǵa - 53 uzaqmerzimdi shart jasady.
«Qazir jasalǵan sharttar sheńberinde 37 ınvestısııalyq joba iske asyp jatyr. Onyń ishinde 127 mlrd teńgege dárilik zattar boıynsha 12 joba, 34 mlrd teńge somasyna medısınalyq buıymdar boıynsha 23 joba bar. Farmasevtıka kásiporyndary negizinen Almaty, Qaraǵandy oblystarynda, Shymkent jáne Almaty qalalarynda shoǵyrlanǵan», dedi Ajar Ǵınııat.