Qart Qarataýdyń eteginde jatqan qaladaǵy aýrýhana 103 myńnan astam halyqqa medısınalyq kómek kórsetedi. Sapaly qyzmetimen emdelýshiler tarapynan oń baǵalanyp júrgen medısınalyq mekemeniń, ásirese hırýrgteri myqty ekenin aıtýshylar az emes. Sonyń bir dáleli – kúni keshe kásibı mereke qarsańyndaǵy marapattaýlarda Kentaý qalalyq ortalyq aýrýhanasynyń dárigeri Jáńgirhan Orazbaqov «Úzdik hırýrg dárigeri» atandy.
Buǵan deıin de, ıaǵnı 2011 jyly «Ońtústik Qazaqstan oblysynyń eń úzdik hırýrgi» atanǵan jáne reseılik «Behterev» atyndaǵy medaldiń ıegeri, joǵary sanatty hırýrg Jáńgirhan Bımahanuly 2013 jyly «Laparoskopııalyq appendektomııadaǵy jańa baılaý ádisin» engizip, Ádilet mınıstrliginiń zııatkerlik menshik quqyǵy komıtetinen «Avtorlyq kýálik» alǵan bilikti maman. Al 2001 jyly Kentaý qalasynda jáne óńirdegi aýdandar arasynda alǵash ret laparoskopııalyq hırýrgııa engizilip, Orazbaqov bastaǵan bilikti mamandar operasııa jasaýdy qolǵa alǵan-dy. Búginde Kentaýda barlyq hırýrgııalyq, gınekologııalyq, ýrologııalyq otalardyń 30-ǵa jýyq túri endovıdeohırýrgııa jolymen jasalady. Sonymen qatar qalalyq ortalyq aýrýhanada bıyldan bastap gemorroı aýrýlaryna joǵary sapaly mınıınvazıvtik Longo operasııasy jasalýda. Mundaı operasııalar úlken qalalarda jáne proktologııalyq ortalyqtarda ǵana jasalady eken. Aýrýhana hırýrgteri bul operasııa túrin tájirıbe júzinde oqyp úırenipti. Jáńgirhan Bımahanuly Longo operasııasy gemorroıdyń 3-4-shi satysynyń klassıkalyq emdik tásili ekenin aıtady.
– Ol kóbine eýropalyq elderde qoldanylady. Bul operasııalardyń aty – Steplerli gemorroıdopeksııa. Shyryshty jáne shyrysh asty qabatynyń rezeksııasy. Operasııa arnaıy qural-saımandarmen, rezeksııamen qatar aınalasyn tıtan skrepkalarymen tigý arqyly iske asyrylady. Operasııanyń jasalý ýaqyty ortasha eseppen 20-30 mınýtty alady. Eki-úsh kúnde aýrý klınıkadan shyǵarylady. Jalpy «hırýrgtiń qoly – áıelderdikindeı názik, kózi – búrkittikindeı qyraǵy, júregi – arystandaı aıbatty bolýy kerek» degen sóz bar. Meniń oǵan qosarym – sózi durys bolýy kerek. Iаǵnı árbir dáriger kez kelgen adammen til tabysyp, sóılese alýy qajet. Hırýrg bolý óte qıyn. Adamnyń qanyn kórý, onymen jumys isteý kez kelgen adamnyń qolynan kele bermeıdi. Úlken jaýapkershilikti talap etedi. Adam ómirine jaýapty bolasyz. Operasııa jasamas buryn qalaı bolar eken dep oılanyp shyqsaq, operasııadan keıin de túnimen uıyqtaı almaıtyn kezderimiz bolady. Dárisin berip, ýkolyn salyp ketetin basqa salalarǵa qaraǵanda, hırýrgııa salasynyń salmaǵy óte aýyr. Desek te, hırýrgııa bólimshesiniń qyzmeti – aýrýhananyń aınasy. Hırýrgııasy jaqsy aýrýhana jaqsy kórsetkishterge ıe bolady, – deıdi dáriger.
Túrkistanǵa qarasty Bozbutaq aýylynda kópbalaly otbasynda dúnıege kelip, orta mektepti úzdik bitirgen Jáńgirhan Bımahanuly Aqtóbe memlekettik medısına ınstıtýtyn támamdaǵan soń, ıaǵnı 1990 jyly Kentaýǵa kelip, hırýrgııa jáne reanımasııa bólimine qyzmetke ornalasty. Keıinnen hırýrgııa bólimshesiniń meńgerýshisi qyzmetine taǵaıyndaldy. Al 2013 jyldan beri bólimshege ýrologııa, gınekologııa bólimsheleriniń qosylýyna baılanysty bosatylǵan bólim meńgerýshisi qyzmetin atqarýda. Talaı jandy ajaldan arashalap qalǵan maman búginde óńirdegi bilikti hırýrgterdiń birine aınalǵan. Jany taza, eńbegine adal dárigerdiń qoly jeńil ekenin estigender jer shalǵaılyǵyna qaramastan dertine daýa surap, Jáńgirhandy ádeıi izdep keletin bolǵan. «Biz eńbek jolymyzdy bastaǵan jyldary operasııa jasaǵanda keńes suraıtyn maman múlde bolmaǵan edi. Bar jaýapkershilikti óz moınymyzǵa alyp, operasııa jasaıtynbyz. Ol kezdegi medısınalyq qural-jabdyqtar men oqý quraldary da qazirgimen salystyrýǵa kelmeıdi. Qazir bári bar ǵoı. Adam densaýlyǵyna qatysty qandaı da bir jaıtty bilgiń kelse, ǵalamtorǵa kirip, qalaǵan málimetti alasyń. Al bizder bolsaq, muqabasy aqjemdelgen kitabymyzǵa júginetinbiz. Osylaısha, medısına salasyndaǵy jańalyqtardy óz betimizshe izdenip, bilip otyrýshy edik. Qazirgi tańda medısınada bir aýrýdy emdeýdiń túri kún saıyn jańaryp jatyr. О́z basym dárigerler qyzmetinen qol úzip, zeınetke shyqqansha oqyp, izdenip ótýge tıis dep oılaımyn. О́ıtpegen jaǵdaıda elimizdiń medısına salasy zaman kóshinen qalyp qoıatynyn jadymyzdan shyǵarmaýymyz kerek», deıdi Jáńgirhan Bımahanuly.
Túrkistan oblysy