ASTANA. 24 sáýir. Úkimet syrttaǵy qandastarymyzdy ata-jurtqa oralýǵa yntalandyratyn sharalarǵa qoldaý bildiredi. Ortalyq kommýnıkasııalar qyzmetinde ótken brıfıngte Eńbek jáne áleýmettik qorǵaý mınıstri Tamara Dúısenova osylaı dedi. Bul týraly «QazAqparat» habarlady.
T.Dúısenovanyń aıtýynsha, «Halyqtyń kóshi-qon máseleleri týraly» Zańnyń kóptegen tustary qaıta qaralyp, ondaǵy qoıylǵan talaptar birshama jeńildetildi. Máselen, buǵan deıin oralmandardy el aýmaǵyna jaıǵastyrý isin Úkimet sheshetin. Endi oralmandar qaıda qonystanatyndaryn ózderi tańdaıdy. Tek Úkimet jaǵy eńbek resýrstary jetkiliksiz aımaqtardy anyqtap, syrttan kelgen qandastarǵa aqparat berip otyrady. Eńbek resýrstary az óńirlerge baryp, tirshilik etemin deýshi oralmandarǵa memleket tarapynan áleýmettik paketter usynylady. Dáliregin aıtqanda, ondaı jandardyń jol shyǵyny óteledi jáne jaldamaly turǵyn úı baǵdarlamasyna qatysa alady. Sondaı-aq, olarǵa jalǵa berilgen úıdi bes jyldyń ishinde ózderiniń menshigine aýdarýǵa múmkindik berilmek.
Taǵy bir erekshe toqtalar jáıt, atamekenin ańsap jetken aǵaıyndar Qazaqstan azamattyǵyn bir jyldyń ishinde ala alady.
Brıfıngte Tamara Dúısenova: «Qoldanystaǵy zańnamaǵa sáıkes, oralmandar tórt jyl Qazaqstanda ýaqytsha turǵyn retinde sanalyp, sodan keıin oǵan úsh jyldyń ishinde azamattyq alý múmkindigi beriletin. Bunyń barlyǵy qazir bir jylǵa deıin qysqartylýda. Olar elge kelip, bir jyldyń ishinde azamattyq alady», – dedi.
Qazirgi kezde oralmandar jalpy halyq sanynyń 5,5 paıyzyn qurap otyr. Iаǵnı, resmı málimetke sáıkes, 1991 jyldan beri 994 myń oralman Qazaqstan aýmaǵyna qonystanǵan.
Joldybaı Bazar.
Derekkóz: «QazAqparat».
Foto: Nur.kz.