Májilistiń búgingi jalpy otyrysynda «Geodezııa, kartografııa jáne keńistiktik derekter týraly» zań jobasy men ilespe qujat birinshi oqylymda maquldandy, dep habarlaıdy Egemen.kz.
«Qoldanystaǵy geodezııa jáne kartografııa týraly zań 2002 jyly qabyldanǵan. 20 jyl ishinde geodezııa men kartografııa salasynda eleýli ózgerister boldy. Sıfrlyq tehnologııalar, spýtnık jabdyqtary óndiriske engizilip, keńinen qoldanylyp keledi. Keńistik derekteriniń dáldigine, ólsheý tıimdiligine degen talaptar ósti», dedi Sıfrlyq damý, ınnovasııalar jəne aeroǵarysh ónerkəsibi mınıstri Baǵdat Mýsın.
Onyń aıtýynsha, saladaǵy olqylyqtar men qaıshylyqtardy túzetý úshin jańa zań jobasyn qabyldaý - zaman talaby.
«Geodezııa jáne kartografııa salasynyń jaǵdaıy memlekettegi kadastr, jer men múlik qatynastarynyń sapasyna tikeleı áser etýi óte mańyzdy. Demek, bul árbir azamattyń múddesin qozǵaıdy. Halyqtyń kópshiligi geodezııa ǵylymymen tanys emes. Biz turatyn ári jumys isteıtin ǵımarattar, júretin joldar men kópirlerdi jobalaý, salý kezindegi qatelikterdi joıý, sondaı-aq ushaqtardyń ushýy men qonýy kezindegi kedergilerdi anyqtaý jáne basqa da salalar geodezııa ólshemderiniń dáldigine baılanysty. Zań jobalarynyń negizgi mindetteri – Qazaqstan Respýblıkasyn joǵary dáldikti geodezııa koordınattar júıesimen qamtamasyz etý jáne onyń negizinde eldiń biryńǵaı sıfrlyq kartografııa negizin qurý», dedi mınıstr.
Mınıstrdiń sózine qaraǵanda, qazir elimizde keńestik ýaqyttan qalǵan 1942 jylǵy SK-42 memlekettik koordınatalar júıesi ornatylǵan. Bul júıe qazirgi zamannyń talaptaryna saı emes, ábden eskirgen, derekterdiń dáldigi men tıimdiligi tómen. Zań jobasynda qarastyrylǵan jańashyldyqtardyń biri – Ulttyq keńistik derekteri ınfraqurylymyn engizý. Iаǵnı aqparattar dál, jedel jáne ózekti bolýy úshin keńistik derekteri bir platformada biryńǵaı formatta jáne biryńǵaı talaptarǵa saı qurylady.