Baǵa bılegen búgingi naryqtyń jazylmaǵan zańy bar. Qazir kez kelgen kisiden surańyz, qańtar-aqpan aılaryn «óli maýsymǵa» balaıdy. Bul aılarda aqsha, saýda týraly áńgime qozǵalsa, kúmiljip qalatynyn menen de jaqsy bilesizder. Al naýryz týysymen tabıǵat anamen birge tirshilik te, ekonomıka da esin jııa bastaıdy. Barlyq salaǵa jan kiredi. Kóktem kelip shýaǵyn tókkeni óz aldyna, demek naryqtyń kúrmeýiniń ózi jyldyń kelýine táýeldi eken. Bul da bolsa zamanaýı naryqtyń ózi jyl basy Naýryz ıgiligine ılikkeniniń bir kórinisi emes pe?
Prezıdent Qasym-Jomart Toqaev pármenimen Naýryz merekesin toılaýdyń jańa tujyrymdamasy ázirlenip, Amal kúninen bastap on kún atap ótýdi halyq oń qabyldady. «Jurtshylyq bul bastamany jaqsy qabyldady. Ásirese Naýryznamadaǵy «Ulttyq kıim» kúni qoǵamnyń zor qoldaýyna ıe boldy. Ulttyq kıimderge degen qyzyǵýshylyq arta tústi», degeni esimizde.
Memleket basshysy osylaı uıǵarǵany nur ústine nur dep bilemiz. Baqsaq, munyń da syry men shejiresi tereńde eken. Kóshpeli hám otyryqshy mádenıet saltanat qurǵan Uly dalamyzda Naýryzdy aptalap, aılap toılaý erteden qalyptasqanyn tarıhtyń ózi áıgileıdi. Qazybek bı aıtpaqshy, jaqsylyqty asyra bilgen elmiz. Árige barmaı-aq beriden qaıyrǵanda, áýlıe Máshhúr Júsiptiń bir emes, birneshe jazbasynda kezdesedi. «Jıyrma toǵyz jasymda Buqarı sháripte Ǵabdolla hannyń Naýryznama toıynyń ishinde segiz kún boldym. Dál segizinshi kún mazarshárıf delinedi. Qoja Báhýaldın áýlıeniń basyndaǵy kólshikke qant tógip, sýdy qant tatytyp, jurt jabyla iship, toı tarqar bolady», deıdi eken. Abaı, Máshekeń zamanynan Naýryznama ataýyna ıe jyl basyn kóbine baı, aýqatty kisiler uıytqy bolyp toılaǵan desedi. Jáne sýdy qant tatytyp, kópshilik jabyla ishken soń, buqaranyń toıyna aınalǵanyn ańdaımyz.
Qazir qazaq dalasynda osy úrdistiń bári saqtalyp turǵany kóńilge qýanysh syılaıdy. Qashannan beri qazaq zııalylarynyń aýzynan túspegen meıramnyń búgingi tujyrymdamasy burynǵy ańyz-áńgimelerdegi Naýryzdan bir kem soqpaıdy. Alǵashqy, 14 naýryzda Amal týady, Kórisý kúni keledi, bul ýaqytta kún men tún teńeletini byltyrdan beri aıtylyp júr. Rasynda telefonyńyzdan kún shyǵatyn mezgilmen batatyn mezetti qarasańyz, osy kúni teńesedi eken. Demek, bul kórisý kisilermen qaýyshý ǵana emes, jylmen, kúnmen, jaryqpen kórisý ekenin túsinýge kóp aqyldyń keregi joq. Onyń ústine qazaq osy kúni bir jasyńmen demeı me? Bir jyldy artqa tastap, jańa jylǵa saý ótýińmen degendi áıgileıdi.
Eskiden qandaı lepes qalsa da jón-josyqsyz aıtylmaǵany kórinedi. Munan soń Naýryznamanyń onkúndiginde Qaıyrymdylyq, Ulttyq salt-dástúr, Ulttyq kıimder kúni, Shańyraq kúni, Jańarý, Yntymaq kúnderiniń árqaısynyń ári jańa, ári eski ǵajaıyp mánderi bar. Bul belgiler qazir biz osynda júrgen soń biline bermeýi múmkin, mundaıdyń qadirin shetelde Otanyn ańsap júrgender bilse kerek-ti. Qalaı desek te jyl basy Naýryzdyń tujyrymdamalyq negizi kez kelgen sanaly azamattyń kókeıine qonatynyn aıtqymyz keledi. Shyn mánindegi jyl keletin jaryq kún, kóktem merekesi emes pe? «Ata-anadaı eljirer kúnniń kózi» deıtin ýaqyt – osy. Qyzýy artyp kún shyǵady, qyzyqtyryp gúl shyǵady, tastan sý aǵady, aǵash búrshik atady da, jańarǵan álem jan anadaı shýaǵyn tógedi.
Jyl saıyn jańa ómirge bastap, shýaq syılaıtyn tabıǵat ananyń osyndaı óshpes qasıetin toılaıyq ta, toılasaq. Endeshe, ana júreginiń meıirimindeı jańa jyl tek jaqsylyǵymen jarylqasyn.