Elbasy Nursultan Nazarbaevtyń Qazaqstan halqyna joldaǵan «Qazaqstan joly – 2050: bir maqsat, bir múdde, bir bolashaq» atty Joldaýynan taıaýdaǵy 2-3 jylda dýaldi jáne tehnıkalyq bilim berýdiń ulttyq negizin qalaý qajettigi jóninde qoıǵan mindetteri maǵan etene jaqyn kórinedi. Bolashaqta jastardyń tehnıkalyq bilim alýyna memlekettik kepildik bolý kerektigin qaraý mindeti qoıylyp otyr.
Kásiptik-tehnıkalyq bilim berý júıesi úshin dýaldi model keńestik mektepten tanys. Ol kezde bul óndiristik oqytý dep atalatyn. Alaıda, uqsas bolǵanymen qazirgi talap tipti basqa. Eger keńestik júıe kezinde óndiristik oqytý jalpy oqý ýaqytynyń 50-60 paıyzyn alsa, qazir stýdentterdiń bilim alý ýaqytynyń 70-80 paıyzyn óndiristik tájirıbede ótkizýi talap etiledi. О́ıtkeni, búginde qoǵamnyń jumysshy mamandyqtaryna zárýligi qatty bilinedi. Bizdiń shaǵyn qalanyń ózinde qolynda tabaqtaı dıplomy bar ekonomıster men zańgerlerdiń eńbek naryǵyna kereksizdigin, jumys taba almaı júrgendigin jıi kezdestiremiz. Onyń esesine bilikti dánekerleýshiler, qurylysshylar, montajshylar jetispeıdi. Osynyń saldarynan kereǵar kórinister oryn alyp jatady. Adamdardyń turǵyn úıge degen suranysyn qamtamasyz etý qurylystyń shapshań júrýine baılanysty. Biraq boı kóterip jatqan qurylystar sapasynyń jıi synǵa ushyraýynyń bir ushy bilikti jumysshy mamandyqtarynyń jetispeýshiliginde jatyr. Jumysshy mamandyqtaryn daıyndaý isine kóńil bólinbegen, mán berilmegen jyldardyń nátıjesi, mine, osyndaı tapshylyqqa ákelip otyr. Bul másele jas kadrlardyń jetispeýimen birge, jumysshy mamandardyń qartaıýymen de tereńdep, ózektilenip barady. Ásirese, búginde elimiz óndiristik-ınnovasııalyq damý jolyna túskende jumysshy mamandarynyń burynǵydan da beter qajettigi seziledi.
№7 Kentaý kolledjinde qala men aýyldardan, aýdandardan kelgen, qarapaıym otbasylarynan shyqqan jastar oqıdy. Olar kolledjge tek dıplom úshin ǵana emes, keıin ózine jumys tabýǵa múmkindik beretin mamandyǵyn meńgerýge keledi. Kolledjdiń oqytýshylary men sheberleri oqý isin barynsha tájirıbege, óndiriske jaqyndatýǵa kúsh salady. Sońǵy jyldary bizde avtomobıl slesarleri, stanokshy, slesar-qurylysshy mamandyqtary ashyldy. Kásiporyndarmen birlese otyryp, oqý josparyn qaıta qaradyq, oqý úderisiniń kestesi qaıta jasaldy. Kolledj dırektory M.Kúnpeıisovtiń iskerliginiń jáne oblystyq bilim berý basqarmasy kómeginiń arqasynda oqý ornynyń materıaldyq bazasy jaqsardy. Plastık terezelerdi jasaýǵa arnalǵan aǵashtardy óńdep, ajarlaıtyn stanoktar alyndy. 2013 jyly kolledjdiń jataqhanasyn jóndeýden ótkizdik, onda oqýshylar úshin barlyq jaǵdaı bar, úı jumysyn oryndaıdy, demalady. Jataqhananyń bolýy kolledj úshin úlken jetistik dep bilemin. Sebebi, qazir keıbir joǵary oqý oryndarynyń jataqhanasy bolmaǵandyqtan, stýdentter qalada páter jaldaıdy. Al bizdiń oqýshylar jatar orny úshin aıyna 4,5 myń teńge ǵana tóleıdi. Bul stýdent pen onyń ata-anasy úshin úlken kómek. О́tken jyldan bastap kolledj stýdentteri shákirtaqy alady, ashana jumys isteıdi.
Kolledjde uıymshyl, isker ujym qalyptasqan. Mundaǵy 23 oqytýshynyń barlyǵynyń da joǵary bilimi bar. Sonymen qatar, 24 sheberdiń jartysynan kóbi joǵary bilimdi ustazdar. Qazir kolledj Kentaý ekskavator zaýytymen, qalalyq energetıkalyq jeli, qoǵamdyq tamaqtandyrý júıesi kásiporyndarymen áriptestik baılanys ornatqan. Degenmen, «Kentaý transformator zaýyty» aksıonerlik qoǵamyn negizgi jáne eń iri áriptesimiz der edik. Stýdentterdiń óndiristik tájirıbeden ótýi kásiporyndaǵy mamandardyń ýaqytyn alǵanymen, belgili bir resýrstyq shyǵyndary bolǵanymen olar da bul máselege múddelilikpen qaraıdy. Búgingi shyǵynnyń erteń qaıtarymy bolaryn kásiporyn basshylary da jaqsy túsinedi. О́tken jyly bizdiń túlekterdiń 80 paıyzy jumysqa onalastyryldy. Qalada jumyssyzdyq óte ózekti bolyp turǵanda, bul kolledj stýdentteriniń qoǵamdaǵy osy syrqatqa qarsy atoı salýy dep qýandyq.
Kolledj ujymy kásiporyndarmen áriptestik baılanysty nyǵaıta túsý kerek dep biledi. Sondyqtan bizdiń stýdentterdiń oqý úderisin barynsha óndirispen jaqyndata túsý kerektigin de bilip otyrmyz. Bizge mamandyq standarttar jáne sertıfıkattaý baǵasynyń táýelsiz júıesi qajet. О́ndiristegi tálimgerlik ınstıtýtyn qaıta jandandyrý kerek. Kolledj óz jumysyn ólkedegi eńbek naryǵyn retteý jáne eńbek resýrstarymen qamtamasyz etý josparyna sáıkes júrgizetin bolady. Tek kolledj ǵana emes, árbir túlek, ár adam óziniń jeke jumysyn osy turǵydan qura bilse quba-qup bolar edi. Elbasy shaǵyn bıznes ár otbasynyń urpaqtan-urpaqqa beriletin dástúrine aınalýy kerektigin alar asý etip qoıyp otyrǵanda, kásibı mamandyq berý júıesi de oǵan óz sózin aıtyp, óz úlesin qosýy tıis.
Uljan KÚLBAEVA,
№7 kolledj dırektorynyń
oqý isi jónindegi orynbasary.
Ońtústik Qazaqstan oblysy,
Kentaý qalasy.