Senattyń jalpy otyrysynda «Qazaqstan Respýblıkasynyń keıbir zańnamalyq aktilerine ınnovasııalardy yntalandyrý, sıfrlandyrýdy, aqparattyq qaýipsizdikti damytý jáne bilim berý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy Egemen.kz.
Qujat memlekettik basqarýdy sıfrlyq transformasııalaý, elektrondy qujattardy qoldaný aıasyn keńeıtý jáne derekterdi basqarý júıesin ınstıtýsıonalızasııalaý maqsatynda ázirlendi.
Zań odan ári sıfrlandyrý jáne reınjınırıng arqyly memlekettik basqarýdy jetildirýge, sondaı-aq sıfrlyq qujattar servısin qoldaný aıasyn keńeıtýge, elektrondy qujattardyń olardyń qaǵazdaǵy uqsastyqtarymen teń dárejeleligin qamtamasyz etýge baǵyttalǵan.
Senattyń Ekonomıkalyq saıasat, ınnovasııalyq damý jáne kásipkerlik komıtetiniń aqparatyna sáıkes, azamattyq hal aktilerin memlekettik tirkeý salasynda kýálikterdi elektrondy formatqa kóshirý bóliginde birqatar ózgerister men tolyqtyrýlar engiziledi. Máselen, azamattyq hal aktilerin memlekettik tirkeý týraly kýálik, anyqtama qaǵaz nusqada, sondaı-aq elektrondy sıfrlyq qoltańba arqyly kýálandyrylatyn elektrondyq nysanda beriletin bolady.
«Baılanys týraly» Zań aıasynda baılanys operatory Qazaqstan Respýblıkasynyń radıojıilik spektrin paıdalanýǵa arnalǵan ruqsatta kórsetilgen eldi mekender men aýmaqtardy kórsetiletin baılanys qyzmetterimen qamtamasyz etý jónindegi mindettemelerdi oryndamaǵany, sondaı-aq radıojıilik spektrin bir jyl ishinde paıdalanbaǵany úshin ákimshilik jaýaptylyq engiziledi.
Májiliste zań jobasymen jumys júrgizý barysynda birqatar túzetýler qabyldandy. Máselen, «Alqabıler týraly» Zańǵa alqabılerge kandıdattardyń biryńǵaı tizimin qalyptastyrý tártibin reglamentteıtin normalar engizildi.
«Qabyldanǵan zań basqarýshylyq sheshimder qabyldaý kezinde ınnovasııalyq sıfrlyq tehnologııalardy qoldaný aıasyn keńeıtý úshin zańnamalyq jaǵdaı jasaýǵa baǵyttalǵan. Sonymen qatar zań aıasynda aýyldarda baılanys sapasyn jaqsartý jáne memlekettik qyzmetterdi alý kezindegi azamattar men bıznestiń shyǵyndaryn tómendetý kózdelip otyr», dedi Senat tóraǵasy Máýlen Áshimbaev.