Qyzylorda oblysynda Kongo-Qyrym qandy bezgegine shaldyqqandar sany 15-ke jetip otyr. Onyń 8-i zerthanalyq jolmen naqtylanǵanyn jetkizgen sala mamandary oblys turǵyndaryn zııankesterden qorǵanyp júrýge shaqyrdy. Olardyń aıtýynsha, syrqattanǵannyń kópshiligi aýrýhanaǵa aýyr jaǵdaıda jetkizilgen.
– Olardyń 70 paıyzynda klınıkalyq belgiler bolǵanymen dárigerlerge der kezinde qaralmaǵany belgili bolyp otyr. Qazir aýrýǵa shaldyqqan azamattarǵa tıisti em júrgizilýde. Búginde oblysta aýrý qozdyrýshy keneniń 16 túri bar. Olardyń qatary jyldan-jylǵa kóbeıip keledi. Bul – alańdatarlyq jaǵdaı. Kongo-Qyrym qandy bezgeginiń belsendiligi, ásirese mamyr jáne maýsym aılarynda qatty baıqalady, – deıdi oblystyq sanıtarııalyq-epıdemıologııalyq baqylaý departamenti basshysynyń orynbasary Álııa Ábdiqaıymova.
Oblystyq juqpaly aýrýlar aýrýhanasynda em alyp jatqandardyń bári – sońǵy aptada aýyrǵandar. Olarǵa aýrýhanaǵa kelgen kúnnen bastap arnaıy preparattar berilip, 3 ret zerthanalyq tekseristen ótti. Aýrýhana bas dárigeriniń orynbasary Aına Muhambetova Kongo-Qyrym qandy bezgeginiń basty belgileri baıqalsa jedel túrde medısınalyq tekseristen ótý qajetin aıtady.
Qyzylorda oblysy