Májilis depýtattary Danııar Álimbaev pen Álııa Ábsemetova Jetisý oblysyna sapary barysynda Alakól aýdanyndaǵy kásipkerlik jáne týrızm salasynyń ókilderimen kezdesti.
Issapar barysynda májilismender Úsharal qalasy áýejaıynyń ushý-qoný jolaǵyn jóndeý barysymen tanysty. Depýtattar áýejaıdy aralap, ǵımarattyń qaýipsizdik júıesin baqylady.
«Áýejaı 2018 jyly ashylǵan. 2021 jyldan bastap ushý jolaǵyn qaıta jóndeý jumystary júrgizile bastady. Osy aıda jóndeý jumystary aıaqtalady dep josparlanýda. Tamyz aıynan bastap óz jumysyn jandandyrady», dedi áýejaı basshysy Áshirbek Baqytjanov.
Aıta keteıik, áýejaı kúnine 400 adam qabyldaýǵa qaýqarly. Sondaı-aq halyq qalaýlylary birqatar týrıstik nysandy aralady. Alakól kóli jaǵalaýyn damytýdyń bas josparyna sáıkes sýmen, elektrmen qamtý, káriz júıesin júrgizý qolǵa alynǵan. Bıyl jaǵalaýda 3 iri ınvestısııalyq joba júzege asyrylyp, iri demalys oryndary iske qosyldy. Jalpy sany 100-ge jýyq jańa jumys orny ashylyp, jobalarǵa 3 mlrd teńgege jýyq ınvestısııa tartylǵan. Byltyr jaǵalaýda 1 mln 400 myń adam demalyp, 8,5 mlrd teńgege qyzmet kórsetilgen.
Jergilikti bılik ókilderiniń aıtýynsha, bıyl jaǵalaýdy qorshaý jumystary bastalǵan. Aqshı men Kóktuma aýyldyq okrýgterinde jalpy uzyndyǵy 13,4 shaqyrym jaǵalaý qorshalýǵa tıis. Jobanyń quny 6 mlrd teńge, qarjy kezeń-kezeńimen bólinedi.
Jetisý oblysy