«Qazaqfılm» kınostýdııasynyń bazasynda «Qazaqanımasııa» shyǵarmashylyq birlestigi qurylady. Bul týraly búgin Mádenıet jáne sport mınıstri Dáýren Abaev óziniń Facebook paraqshasynda jazdy, dep habarlaıdy Egemen.kz.
Jyl sońyna deıin birlestik on pılottyq jobany usynady, al talantty jas anımatorlar sheteldik mamandardan arnaıy dáris alady.
«О́zderińizge belgili, jas urpaq tárbıesi anımasııamen tyǵyz baılanysty. Qazirgi tańda búlidirshinderimiz batystan úzdiksiz kelip jatqan sheteldik ónimderdi qarap, tilimizge de, dilimizge de qaıshy mýltfılmderdi kóptep kórip jatqany jasyryn emes.
Sol sebepti de biz ózimizdiń ulttyq qundylyqtarymyzǵa negizdelgen otandyq ónimderimizdiń órisin keńeıtýdi qolǵa alyp otyrmyz. Mádenıet jáne sport mınıstrliginiń tikeleı bastamasymen «Qazaqanımasııa» birlestiginiń jumysyn iske qosý – eń aldymen ulttyq anımasııany qoldaýdyń jańa júıesin qalyptastyrady. Árıne, aýqymdy jumysty birden jolǵa qoıý ońaı emes.
Birinshi kezekte anımasııalyq pılottyq jobalardyń ssenarıılerine baıqaý uıymdastyryldy. Qazirde usynylǵan jobalardy irikteıtin saraptamalyq keńes quramyz», delingen jazbada.
Sondaı-aq jıynda otandyq anımasııa mamandarynyń sheteldik kompanııalarda taǵylymdamadan ótýi jaıly másele jan-jaqty saralandy.
«Búginde álemniń birneshe jetekshi anımasııalyq stýdııasynan sheteldik maman tartý arqyly, jyl sońyna deıin alǵashqy 10 pılottyq jobany kórermenge usynýdy kózdep otyrmyz. Biz osy jumystar arqyly ulttyq anımasııanyń básekege qabilettiligin arttyryp, ol ónimderdi úlken prokatqa shyǵarýdy josparlaımyz. Zaman kóshinen qalmaı, bilimdi de bilikti shyǵarmashyl jastarymyzdy qoldap, jańa ıdeıalar men tyń bastamalarǵa yńǵaıly alań jasaýymyz qajet. Aýdıtorııa suranysyn qanaǵattandyratyn sapaly kontent qalyptasyryp, sheteldik áriptestermen tyǵyz baılanys negizinde qazaq anımasııasyn halyqaralyq dárejege kóteremiz dep senemin», dep jazdy mınıstr.