Qaraǵandy óńiri «jasyl aımaqta» bolǵanymen, sońǵy táýlikterdegi kelip túsken aqparattarǵa qaraǵanda, «jaman tumaý» taǵy da bas kótere bastaǵanǵa uqsaıdy. Máselen, oblystyq sanıtarlyq-epıdemıologııalyq baqylaý departamenti usynǵan málimetke saı, sońǵy táýlikte COVID-19 juqtyrǵan 188 naýqas tirkeldi.
Jalpy, óńirde pandemııa bastalǵaly búginge deıin 152 391 adam koronavırýs ınfeksııasymen aýyrǵan eken.
Bul dertke tosqaýyl bola alatyn kúshtiń vaksına saldyrý ekeni belgili. Osy oraıda Qaraǵandy óńirinde turǵyndardyń 75,2%-y, ıaǵnı 675 058 adam ekpeniń birinshi komponentin qabyldapty. Al vaksınanyń ekinshi komponentin saldyrǵandardyń sany 633 013 adamǵa jetken. Bul – jalpy oblys turǵyndarynyń 44,3 paıyzy.
Qazirgi ýaqytta revaksına saldyrý da kún tártibindegi kezek kúttirmeıtin máseleniń biri bolyp tur. Oblysta búginge deıin 245 963 adam úshinshi márte ekpe saldyrypty. Munyń ishinde Pfizer ónimi «Komırnatı» vaksınasyn saldyrǵandardyń sany 67 336 adamdy quraǵan. Budan bólek osy jyldyń 25 mamyrynan bastap óńirde revaksına qaıta salyna bastady. Qazirdiń ózinde 18 743 adam osy ekpeni alǵan.
Al endi, koronavırýs ınfeksııasynyń órshı bastaǵanyna kelsek, Qaraǵandy oblysynyń Sanepıdbaqylaý departamenti óńirdiń barlyq turǵyndary men qonaqtaryna jabyq ǵımarattarda, qoǵamdyq kólikterde maska taǵyp júrý keregin eskerte bastady. Sonymen qatar atalǵan vedomstvonyń mamandary vaksına saldyrýdyń tolyq kýrsynan ótkender úshin «jaman tumaýdan» keler qaýiptiń joǵyn joqqa tán ekenin aıtyp otyr.
Qaraǵandy oblysy