Nur-Sultan qalasy koronavırýstyń taralýy boıynsha «sary» aımaqqa ótýine baılanysty elordanyń bas sanıtar dárigeri Sarhat Beısenovanyń qaýlysy shyqty, dep habarlaıdy Egemen.kz.
Qaýlyda tómendegi shekteý sharalary usynyldy:
– adam kóp jınalatyn oryndarda (avtovokzaldar, saýda-oıyn-saýyq ortalyqtary, saýda úıleri, jabyq bazarlar, konsert zaldary, teatrlar, kınoteatrlar, halyqqa qyzmet kórsetý ortalyqtary, bankter, stadıondar jáne basqa da sport nysandary), uıymdasqan ujymdarda jáne qalalyq qoǵamdyq kólikte betperde kııý. Bes jasqa deıingi balalarǵa jáne tamaqtaný kezinde maska qajet emes;
– 10 adamnan asatyn jıyndardy (otyrystar) qashyqtan ótkizý formatyna kóshirý;
– júkti áıelderdi, densaýlyǵyna baılanysty vaksına saldyra almaıtyn qyzmetkerlerdi jáne koronavırýs juqtyrǵan naýqaspen baılanysta bolǵan adamdardy qashyqtan jumys isteý formatyna aýystyrý;
– turǵyndarǵa koronavırýsqa qarsy ýaqtyly vaksınasııa jáne revaksınasııa boıynsha aqparattyq-túsindirý jumystaryn júrgizý;
– bilim berý uıymdarynda toptar men synyptardy biriktirip is-sharalar ótkizýdi boldyrmaý;
– adam kóp jınalatyn obektilerde, sonyń ishinde qoǵamdyq kólikte dezınfeksııalaý sharalaryn júrgizý, jeldetý jáne aýany baptaý júıeleriniń úzdiksiz jumys isteýi men jeldetý rejımin saqtaý jónindegi jumystardy uıymdastyrý;
– Nur-Sultan qalasynyń Qoǵamdyq densaýlyq saqtaý basqarmasyna halyq arasynda koronavırýsqa qarsy vaksınalaý men revaksınasııany jandandyrý tapsyryldy.
Qaýly 23 shildeden bastap kúshine enedi.