Amerıkanyń Kentýkkı shtatynda iri sý tasqyny boldy. Tabıǵı apattyń saldarynan 30 adam qaıtys bolyp, júzdegen adam iz-túzsiz joǵaldy, dep habarlaıdy Egemen.kz VVS agenttigine silteme jasap.
Nóserli jaýynnan paıda bolǵan tasqyndar ótken aptanyń ortasynda bastaldy. Kentýkkıdiń jekelegen aýdandarynda bir táýlikte 20 santımetrden astam jaýyn tústi. Al Ýaıtsbýrg qalasyndaǵy Kentýkkı ózeniniń deńgeıi birneshe saǵatta 6 metrge kóterildi. Apat saldarynan 12 myńnan astam úı sharýashylyǵy jaryqsyz qaldy, júzdegen úı men kásiporyn sý astynda qaldy.
Ulttyq meteorologııa qyzmetiniń aýa raıyn boljaý ortalyǵy Kentýkkıdiń shyǵys jáne ortalyq bóliginde sý tasqyny qaýpi áli de saqtalyp otyrǵanyn eskertti.
Shtat bıligi men qutqarýshylar qaza bolǵandar sany artatynyn boljap otyr. Joǵalǵan adamdardy izdestirý jumystary birneshe aptaǵa sozylýy múmkin.
«Bul tarıhta bolmaǵan eń dúleı ári adam shyǵyny kóp bolǵan sý tasqyny. Qutqarý jumystary júrip jatyr», dedi shtat gýbernatory Endı Beshır.