QORǴAN BOLAR SARBAZYŃ BAR

Atyraýda №5546 áskerı bólim bar. Ishki ister mınıstrliginiń Ishki  áskerler qolbasshylyǵyna qaraıdy. Qazir munda 400-ge jýyq sarbaz Otan aldyndaǵy boryshyn óteýde. Buryn munda jergilikti jastar da áskerı mindetin óteýge shaqyryla beretin. Tipti, syrqaty bar bir jas jigittiń sonaý Qyzylordadan áskerge shaqyrylyp, osy bólimnen úıine keri qaıtarylǵanyna da kýá bolǵan edik. Al qazir she? Atalǵan áskerı bólimde álgindeı problema kezdesip júr me? Osy saýaldarǵa jaýap alý úshin áskerı bólim komandıriniń tárbıe jáne áleýmettik-quqyqtyq jumystar jónindegi orynbasary, maıor Atabek SALYQBAEVQA jolyqqan edik. Bólim komandıriniń oryn­ba­sary áskerı tártipke saı áńgimege sarań bolyp shyqty. Onysy tú­si­nik­ti de shyǵar. Maıor Atabek Sa­lyqbaevtyń aıtýynsha, jaqyn ara­da 100-den asa sarbazdyń áske­rı mindetin óteý merzimi aıaqta­la­dy. Soǵan oraı sarbazdar qatary maý­sym aıynda tolyǵady dep kú­ti­lýde. Negizinen áskerı bólim sar­bazdary Atyraý qalasy kóshele­rin­degi qoǵamdyq  tártip saqtaýǵa, so­nymen birge, eńbekpen túzeý me­kemesindegi tártipti nyǵaıtýǵa at­salysady. Biraq, bir kezderdegideı batys oblystar men jergilikti jer­diń jastary bul bólimge jibe­rilmeıtin bolypty. Kerisinshe, ózge óńirlerdiń jastary kóbirek jiberiledi. Máselen, ótken jylǵy kúzde Qaraǵandy, Soltústik Qazaq­stan oblystary men Astana qala­synyń jastary áskerı mindetin óteýge kelipti. Jaqyn arada áske­rı mindetin óteý mer­zimi aıaq­ta­la­tyn sarbazdar arasynda Ke­reký  óńiriniń jastary da bar. Sonyń biri, sym­daı tartylǵan qatardaǵy jaýynger Dáý­let Zekenov gazet tilshisin baqylaý-ótkizý be­ketinen áskerı bólim komandıriniń oryn­basarynyń kabınetine deıin ertip júrdi. Mundaǵy sarbazdarǵa barlyq jaǵdaı jasalǵan eken. Kazarma, ashana sekildi ǵımarattarǵa “kó­gil­dir otyn” jelisi júrgizilipti. Bu­ryn kazarmanyń qysta jylýdan, sýdan  taryǵatynyn biletin edik. Endi bári basqasha, jaqsylyq jaǵyna qaraı ózgergen. Bólim sarbazdary úshin arnaıy monsha da saly­nypty. Bólimde maıor Vladımır Nýtkov jetekshilik etetin áskerı orkestr bar. Onyń quramyndaǵy 18 mýzykant kelisim-shartpen jumysqa alynǵan. Kelisim-shart demekshi, byltyr áskerı mindetin óteý merzimi aıaqtalǵan 10 sarbaz osy bólimde kelisim-shartpen qyzmetin jalǵastyrýǵa qalypty. Al bıyl 6 sarbaz áskerı ýchı­lı­she­ge barýǵa tilek bildirip otyr. Bul – Ishki áskerler quramyndaǵy eń úzdik bólimniń biri. “Bizdiń  sar­baz­dar ózderiniń áskerı mindetine adaldyǵymen ár kez tanylyp ke­le­di. Qoldaý kútken jandarǵa qor­­ǵan bolýdy júkteıtin  jaýap­ker­shi­likti túsindi. Qazaq­tyń jigitteri negizinen shymyr, qaıratty bolyp keledi ǵoı. Bólim sarbazy Jandos Qaldyshev 23 sáýirde Jaıyq óze­nin­degi sýǵa batyp bara jatqan  adam­dy qut­qaryp qaldy. Sýdan qut­qarǵan adamdy aýrýhanaǵa apa­ryp, ómirine arasha boldy. Al qa­tar­daǵy jaýynger Bolat Nur­sa­paev IV shaǵyn aýdanda anasynan ada­syp qalǵan úsh jasar baldyr­ǵandy 12 saǵattan keıin “Jeńis saıabaǵy” aýmaǵynan taýyp berdi. Árı­ne, mundaı sarbazdardy ózge­lerge úlgi-ónege etemiz. Ishki ás­kerler bas qolbasshysy R.Jaq­sy­ly­qovtyń buıryǵymen qatardaǵy jaýynger Jandos Qaldyshev “Quqyq tártibin qamtamasyz etýde úzdik shyqqany úshin” tósbelgi­si­men marapattaldy”, deıdi bólim ko­mandıriniń orynbasary Atabek Salyqbaev. О́kinishke qaraı, maqalamyz­dyń basynda aıtylǵandaı, syrqat jasty áskerge jiberý oqıǵasy áli de kezdesedi. Byltyrǵy kúzde Jez­qazǵan óńirinen epılepsııa syr­qa­tyna shaldyqqan bir jigit osy bó­limge jiberilipti. Sonda dárigerler syrqat jigitti táýelsiz elimizdiń qor­ǵany bola alady, dep jibergen ǵoı shamasy. О́zge emes, epılepsııa syrqatyna kóz juma qaraýǵa bol­maıtynyn dárigerler qaýymy jaq­sy biledi. Endeshe, qaltyrap-dirildep, esinen tanyp qalatyn syr­qaty bar jigit áskerı-medı­sı­nalyq komıssııa jiti talqysynan, baqylaýynan qalaı ótken? Álde áskerge barǵysy kelmegen  dókeı balasynyń ornyna “abaısyzda” “qurbandyqqa” shalyndy ma eken? Joldasbek ShО́PEǴUL, Atyraý oblysy. Sýretterdi túsirgen  Orynbaı BALMURAT.