Memleket basshysy Qasym-Jomart Toqaev Parlament Senatynyń Tóraǵasy Máýlen Áshimbaevty qabyldady, dep habarlaıdy Egemen.kz Aqordanyń resmı saıtyna silteme jasap.
Kezdesý barysynda Prezıdentke 14-15 qyrkúıekte elordada ótetin Álemdik jáne dástúrli dinder kóshbasshylarynyń VII sezine daıyndyq barysy baıandaldy.
Parlament Senatynyń Tóraǵasy, Sezd Hatshylyǵynyń meńgerýshisi Máýlen Áshimbaev forýmǵa 50-den asa elden 100-den astam delegasııa keletinin aıtty.
Buryn habarlanǵandaı, aıtýly jıynǵa Rım Papasy Fransısk, Ál-Azhardyń Joǵarǵy ımamy sheıh Ahmad at-Taıeb jáne basqa da dinder kóshbasshylary qatysady dep kútilýde.
Máýlen Áshimbaevtyń aıtýynsha, alda ótkeli turǵan dinaralyq forým álemdik BAQ ókilderiniń qyzyǵýshylyǵyn týdyryp otyr. Sebebi jıynǵa 200-den astam sheteldik jáne 300-den astam qazaqstandyq BAQ qatysý úshin ótinim berip, akkredıtasııadan ótken.
Sezd aıasynda Deklarasııa qabyldanatynyn aıta ketý kerek. Bul qorytyndy qujat forýmǵa qatysýshylardyń órkenıetaralyq jáne konfessııaaralyq, sondaı-aq jahandyq damýdyń ózekti máselelerine degen ustanymyn bildiredi.
Memleket basshysy óz sózinde qazirgi ýaqytta Sezd ótkizýdiń mańyzy joǵary ekenine toqtala ketip, jahandyq dıalog mádenıetin ilgeriletý qajettigin jáne Qazaqstannyń osy úderiske qatysýy mańyzdy ekenin qadap aıtty.
Kezdesý sońynda Máýlen Áshimbaev Senattyń aldaǵy ýaqytqa arnalǵan jumys josparymen bólisti.