Bıyl týǵanyna 110 jyl tolyp otyrǵan Dinmuhamed Ahmetuly Qonaevtyń uzaq ýaqyt boıy Qazaqstandy baıypty basqarǵan, darhan dalamyzda boı kótergen kóptegen qala men nebir sáýleti, sáni kelisken, kóz tartyp, kóńil súısindiretin áleýmettik, mádenı, turmystyq nysandardyń avtory degen atty alǵan, tatýlyqty tý etken kópetnosty halqymenen maqtalǵan zamanymyzdyń zańǵar bıik tulǵasy ekendigi anyq.
Dımash atanyń kisilik kelbeti, danalyqpen bite qaınasqan qaıratkerlik qalpy, alystan arna tartqan aqyl-parasaty, bıik bilim-biligi óz tustastaryn qaıran qaldyrady eken. Ásirese asa qarapaıymdylyǵyn, óte kishipeıildiligin, elmen etene, emen-jarqyn sóılese biletindigin kózimen kórgender jyr qylyp aıtady. Bul tamasha qasıeti talaı jazýshy, jýrnalısterdiń qalamy arqyly da qalyń jurtqa keńinen taraldy.
1975 jyly Jambyl oblysy, Moıynqum aýdandyq partııa komıteti ǵımaratynyń aldynda túsirilgen, jeke muraǵatymyzda saqtalǵan myna sýrette de kemel oıly, keń júrekti asyl azamattyń halyqpen júzdesýiniń biri beınelengen.
...Úlken kisini qýana qarsy alǵan qarapaıym aýyl qarııalary, aq jaýlyqty analar, jalyndy jastar, jigerli jigitter, qyrmyzy qyzdar, balaýsa balalar... Bári de D.Qonaevqa aq tilegin arnaǵysy keledi, barlyǵy da onyń jyly lebizin estigisi keledi... Tipti aınalasyndaǵylardy úreılendire úrkitip, janyna jaqyndatpaıtyn oqqaǵarlary joq ekendigin aıtsańyzshy!..
Dımekeńniń artqy jaǵynda ekinshi turǵan Jambyl oblystyq partııa komıtetiniń birinshi hatshysy, óńirdiń ósip-órkendeýine úlken úles qosqan marqum Hasen Bekturǵanov. Sýrettiń avtory, jańylmasaq, QazTAG-tyń sol kezdegi fototilshisi Gennadıı Koshkınsev.
Iá, D.Qonaev osy jyly alystaǵy aýdan – Moıynqumǵa barǵan bolatyn. Sol saparynda respýblıka basshysy aımaqtyń jaı-kúıimen jan-jaqty tanysqan, aýdan ortalyǵyna taıaý jerdegi Fýrmanov atyndaǵy, sondaı-aq «Taldyózek» sovhozynyń mal qystaýlaryn aralap, malshylardyń eńbek jáne turmystyq jaǵdaıyna jiti nazar aýdarǵan, soǵysta qaza tapqan bozdaqtarǵa arnalǵan eskertkish-obelıskige gúl shoqtaryn qoıǵan.
Sonymen qatar malshylardyń marshaly, qos juldyzdy Jazylbek Qýanyshbaevpen, Sosıalıstik Eńbek Erleri Dildash Itbasovamen, Shoman Sháripbaevpen jáne 1917 jyldan partııa múshesi, «latysh atqyshy», kezinde jazyqsyz qaralanyp osy qumdy ólkege jer aýdarylyp kelgen Vılıs Martynovıch Krastınmen áńgimelesken.
Dımash atamyz, munymen birge, aýdandyq mýzeıdi, kásiptik-tehnıkalyq ýchılısheni, Sáken Seıfýllın atyndaǵy kınoteatrdy asyqpaı aralap kórip, halyqpen júzdesken.
Bul, shyn máninde, moıynqumdyqtar úshin umytylmaıtyn oqıǵa bolyp edi.
Berikbaı QADYQOV,
jýrnalıst
Almaty oblysy,
Qarasaı aýdany