20 qyrkúıektiń basty oqıǵasy Birikken Ulttar Uıymy Bas Assambleıasy 77-sessııasynyń Jalpy debaty boldy. Bul týraly Prezıdenttiń baspasóz hatshysy Rýslan Jeldibaı Facebook paraqshasynda jazdy, dep habarlaıdy Egemen.kz.
Qasym-Jomart Toqaev atalǵan sharada sóz sóılep, birneshe jahandyq ózekti máseleni kóterdi.
«Prezıdent óz sózinde burynnan qalyptasqan álemdik qaýipsizdik júıesin qalpyna keltirýdiń, terrıtorııalyq tutastyqty saqtaýdyń, elderdiń egemendigin qurmetteýdiń mańyzdylyǵyn atap ótti. Sondaı-aq Memleket basshysy Azyq-túlik jónindegi jahandyq sammıtke de qatysyp, sóz sóıledi. Prezıdent álemdik naryqtaǵy Qazaqstannyń rólin attyrýǵa baǵyttalǵan birneshe usynys aıtty. Ol elimizdiń astyq jáne basqa azyq-túlik túrlerin turaqty jetkizýine, Transkaspıı halyqaralyq kólik baǵytyn damytýǵa qatysty boldy.
Jalpy, bıylǵy sheteldik saparlarda Prezıdent eń jıi kótergen máseleniń biri - kólik-logıstıka máselesi. Iаǵnı, búgingi kúrdeli geosaıası jaǵdaıǵa qaramaı otandyq taýarlardy álemdik naryqqa shyǵarýdyń jańa joldary únemi qarastyrylyp jatyr. Sebebi bul el ekonomıkasyna tikeleı yqpal etetin mańyzdy faktor», dep jazdy Rýslan Jeldibaı.
Budan bólek, búgin Memleket basshysy BUU Bas hatshysy Antonıý Gýterrıshpen, Eýropalyq Keńestiń Prezıdenti Sharl Mıshelmen, Eýropalyq komıssııa Prezıdenti Ýrsýla fon der Lıaıenmen, Avstrııa Prezıdenti Aleksandr Van der Bellenmen, Halyqaralyq Qyzyl Krest komıtetiniń Prezıdenti Pıter Maýrermen kezdesip, ekijaqty máselelerdi talqylaǵan.
Sondaı-aq Iordanııa Koroli II Abdallamen, Qatar Ámiri Tamım bın Hamad Ál Tanımen áńgimelesti.
Jalpy, Prezıdent sońǵy eki kúnde 27 kezdesý ótkizip, 3 iri sharaǵa qatysqan.