Zhasproject jobasy – jastardyń erik-jigerin shyńdap, kóshbasshylyq qabiletin arttyrady. Bul ıgilikti is – Aqparat jáne qoǵamdyq damý mınıstrligi men Azamattyq bastamalardy qoldaý ortalyǵynyń muryndyq bolýymen júzege asyp otyr. Biregeı baǵdarlama aıasynda jastar jergilikti turǵyndarǵa paıda ákeletin óziniń áleýmettik jobasyn iske asyrýǵa múmkindik alady.
Atalǵan jobaǵa óz áleýetin, kóshbasshylyq qasıetin damytýǵa qushtar, bastamashyl ıdeıalar men jobalardy iske asyrýǵa múddeli 18-28 jas aralyǵyndaǵy talapkerler qatysty. Munda erekshe basymdylyq áleýmettik osal sanattaǵy jastarǵa berildi. Nıet bildirýshilerdiń ótinimderi saıt arqyly onlaın qabyldandy.
Jetisý oblysy ákiminiń orynbasary Rýstam Álıev atalǵan joba óńir jastaryna úlken qoldaý bolatynyn aıtady.
«Qazirgi ýaqytta jastar arasynda bilim deńgeıiniń tómendigi, ózine jáne bolashaǵyna senimsizdik, masyldyq kóńil kúı, otbasylyq máseleler, jumyssyzdyq sııaqty problemalar ózekti. Sondyqtan atalǵan jobany iske asyrý eń aldymen, jastardy qoldap, olardy qoǵamdyq paıdaly qyzmetke tartý. Jastar óz ómirlerin ózgertýge, ózderine senýge múmkindik alady», deıdi R.Álıev.
Al Aqparat jáne qoǵamdyq damý mınıstrligi Jastar jáne otbasy isteri komıtetiniń basqarma basshysy Almagúl Qutanova mınıstrlik qazir jastar jumysyna qatysty birqatar tásildi qaıta qarastyryp jatqanyna jáne Zhasproject sııaqty ataýly jáne naqty jobalar bolashaqta óz jemisin beretinine senim bildirdi.
Baıqaý kezeńinde jastardan 682 ótinim túsken. Tehnıkalyq irikteý kezeńinde qajetti qujattardyń konkýrs talaptaryna sáıkes kelmeýine baılanysty 321 ótinim qabyldanbady. Arnaıy baıqaý komıssııasy shaǵyn granttar baıqaýynyń 63 jeńimpazyn anyqtady. Onyń ishinde áleýmettik osal sanattaǵy 48 jas bar. Olardyń deni jumyssyzdar, múmkindigi shekteýli jandar, múgedektigi bar bala tárbıelep otyrǵan jas analar, kópbalaly jas analar.
Endi jumyssyz jastar oqyp, óz jobalaryn júzege asyra alady. Máselen, olar naýbaıhana, balalardy damytý ortalyǵy, massaj kabıneti, veb-dızaın kýrstary, robottehnıka, kopıraıtıng, plastmassa, jún, toqyma óńdeýmen aınalysa alady.
Aqshalaı qoldaýdan bólek joba qatysýshylaryna ómirlik mańyzdy daǵdylar men jobalardy basqarý boıynsha qysqasha oqytý usynylady. Sebebi el ishinde áleýmettik kásipkerlik endi ǵana damı bastady. Sondyqtan qoǵamǵa paıda ákeletin jańa jobalardy qurýǵa degen umtylysy bar jastardy jan-jaqty qoldaý barynsha tıimdi.
Jastardy áleýmettik kásipkerlikti júrgizý negizderine úıretý úshin Zhasrroject sekildi bastapqy kezeńde granttyq qoldaý kórsetý qajet. Jasyratyny joq, áleýmettik osal sanattaǵy toptar qajetti bilimge ıe emes. Mysaly, olar kelisimsharttyń qalaı jasalatynyn bilmeıdi, eshqashan shot-faktýrany almaǵan, qajetti zańdardy oqymaǵan. Osyndaı jastardyń qarjylyq jáne quqyqtyq saýatyn arttyrý úshin mentorlar pýly jumys isteıdi.
Zhasproject jobasyn júzege asyrýǵa Almaty jáne Jetisý oblystaryndaǵy aýdandyq jáne qalalyq jastar resýrstyq ortalyqtary, sondaı-aq aýyldyq okrýgterdegi jastarmen jumys jónindegi ádiskerler belsendi túrde tartylǵan. Jergilikti jerlerde jumyspen qamtý ortalyqtarymen, aýyldyq ákimdiktermen birlesip belsendi túsindirý jumystary júrgizilgen.
«О́mirde qıyn jaǵdaıǵa tap bolǵan kez kelgen kópbalaly jas otbasy, múmkindigi shekteýli jandar, shalǵaıdaǵy aýyldardan kelgen aýyl jastary jobaǵa qatysa alady. Munda olar óz kúshine senýge, týǵan aýylyna paıda ákelýge jáne óz isin tabýǵa múmkindik alady», deıdi Almaty jáne Jetisý oblystaryndaǵy Zhasproject jobasynyń jetekshisi Álııa Qudaıbergenqyzy.
Jetisý oblysy