Sheraǵańnyń týǵan kúni qalam ustaǵan qaýym úshin asyǵa kútetin mereke sekildi. Sebebi dál osy kúni Almatyda qaıratker-qalamgerdiń qurmetine arnalǵan dástúrli bılıard týrnıri ótip, jyly estelikter aıtylady.
«Shyndyqtyń shyraqshysy, namystyń naızaǵaıy» atanǵan Halyq jazýshysy Sherhan Murtaza kózi tiri bolsa bıyl 90 jasqa tolar edi. Qazaq sóz óneriniń óristeýine óreli úles qosqan eren tulǵany shyǵarmashyl qaýym jyl saıyn úlken saǵynyshpen eske alady. Este bolsa, Sheraǵańa arnalǵan bılıard týrnırin ótkizý isine jazýshynyń 85 jyldyq mereıtoıy qarsańynda «Egemen Qazaqstan» gazetiniń basshylyǵy bastamashy boldy. Sol kezde Sheraǵań densaýlyǵyna baılanysty týrnırge kele almasa da, ıgi ıdeıany qolǵa alǵan inilerine rızashylyǵyn bildirip, batasyn bergen edi. Sodan beri dástúrli týrnır úzbeı jalǵasyn taýyp keledi.
Bıyl Almaty qalalyq Qoǵamdyq damý basqarmasy men О́ńirlik kommýnıkasııalar qyzmeti birlese uıymdastyrǵan jarysta BAQ ókilderi baq synady. «Dınamıkalyq pıramıda» qaǵıdaty boıynsha ótken bılıard týrnırine 30-dan astam jýrnalıst qatysyp, jarys talabyna saı ár redaksııadan eki oıynshy óner kórsetti. Jarty kúnge sozylǵan qyzý báseke barysynda aǵa býyn tarapynan Sherhan Murtaza jaıly jarqyn estelikter aıtyldy.
– Sherhan aǵa, shúbásiz qazaq ádebıetiniń maıtalmany. Onyń qalamynan órilgen ár shyǵarmadan ýaqyt úni estiledi. Ádebıet pen jýrnalıstıkanyń kóshin qatar alyp júrgen taǵylymdy tulǵa, qaıratkerlik qyrymen de jurt jadynan berik oryn aldy. Bıik minbelerden ulttyń joǵyn joqtap, ádilettiń aq týyn joǵary ustady. Búgingi bılıard týrnırin osy bir kemeńger tulǵanyń kóńil syry, ómir jyry jaıly izgishýaq estelikter aıtylǵan rýhanı júzdesý dep esepteımin, – deıdi týrnırge qatysqan Ál-Farabı atyndaǵy Qazaq ulttyq ýnıversıteti Jýrnalıstıka fakýltetiniń professory Aıazbı Beısenqulov.
Sher-aǵańnyń súıikti oıyny bolǵan tastaıaq almatylyq zııaly qaýymnyń basyn qosatyn ıgi jobaǵa aınalǵanyn aıta ketý kerek. Jarysqa qatysýshylar ásirese shyǵarmashylyq adamy úshin bul oıynnyń paıdasy zor ekenin tilge tıek etti.
Týrnır qorytyndysyna saı «Qazaq radıolary» komandasy kósh basynan kórinse, «Almaty» telearnasynyń jýrnalısteri ekinshi oryndy enshiledi. Al úzdik úshtikti Tengrinews aqparattyq saıtynyń tilshileri túıindedi. Eske salsaq, eki apta buryn Almatyda Buqaralyq aqparat quraldary ókilderiniń qatysýymen Sherhan Murtaza atyndaǵy fýtbol týrnıri márege jetken bolatyn.
ALMATY