Qazaqstan Prezıdentiniń bastamasymen TMD-da baqylaýshy jáne áriptes mártebesin belgileý boıynsha qujattardy daıyndaý jumystary bastalady. Bul týraly Premer-Mınıstrdiń orynbasary – Syrtqy ister mınıstri Muhtar Tileýberdi aıtty, dep habarlaıdy Egemen.kz.
«Bul bastama Dostastyq jumysyna basqa elder men halyqaralyq uıymdardy tartýǵa múmkindik beredi», dedi Muhtar Tileýberdi TMD Memleket basshylary keńesiniń otyrysynda ótken brıfıngte.
SIM basshysynyń aıtýynsha, adam quqyqtary men bostandyqtaryn qorǵaý salasyndaǵy yntymaqtastyqty nyǵaıtý maqsatynda TMD-nyń Adam quqyqtary jónindegi komıssııasy týraly jańa ereje qabyldanǵan.
«Sammıttiń basqa sheshimderiniń qatarynda eki halyqaralyq shartqa qol qoıý bar. Bul TMD-ǵa qatysýshy memleketterdiń saılaý organdary basshylarynyń Konsýltatıvtik keńesin qurý týraly kelisim jáne Sybaılas jemqorlyqqa qarsy is-qımyl salasyndaǵy yntymaqtastyq týraly kelisim», dedi M. Tileýberdi.
Budan buryn habarlanǵandaı, Qazaqstan Prezıdenti Qasym-Jomart Toqaevtyń tóraǵalyǵymen TMD-ǵa múshe memleketterdiń Memleket basshylary keńesiniń shaǵyn jáne keńeıtilgen quramdaǵy otyrysy ótti.