Parlament Senatynyń Tóraǵasy Máýlen Áshimbaev «Kórkemóner akademııasy» qoǵamdyq qorynyń 15 jyldyǵyna oraı Ulttyq mýzeıdiń bastamasy boıynsha uıymdastyrylǵan «Uly Dala sazy» kórmesine bardy, dep habarlaıdy Egemen.kz Parlament Senatynyń baspasóz qyzmetine silteme jasap.
Máýlen Áshimbaev murajaıdy aralaý barysynda Akademııa múshelerimen áńgimelesip, jańa jádigerlermen tanysty. Ekspozısııada 150-den astam keskindeme, 30-dan astam grafıkalyq jumys jáne músin bar. Olardyń kópshiligi sońǵy jyldary dúnıege kelgen jáne áli de ónersúıer qaýymynyń nazaryna usynylmaǵan týyndylar.
Senat tóraǵasy mádenıet pen óner ulttyq erekshelikti saqtaýdaǵy asa mańyzdy máselelerdiń biri ekenin atap ótti.
«Kóshpendilerdiń estetıkasy men dúnıetanymy óte tereń jáne erekshe. Kóshpendilerde adam tabıǵatpen etene jaqyn bolyp, álemniń úılesimdi bóligine aınaldy. Qorshaǵan ortaǵa janashyrlyqpen qaraý – nomadtardyń dúnıetanymyndaǵy mańyzdy erekshelikterdiń biri boldy. Osynyń bári kóshpeli halyqtardyń beıneleý ónerinde de kórinis tapty», dep atap ótti Máýlen Áshimbaev.
Senat tóraǵasynyń pikirinshe, búginde kóptegen otandyq sýretshiler kóshpendilerdiń ónerin zamanaýı turǵyda zerdelep, ony álemdik mádenıettiń mańyzdy bóligine aınaldyrý jolynda eseli eńbek etip keledi.
«Sýretshiler arasyndaǵy bizdiń qurmetti aqsaqalymyz Amandos Aqanaev nomadtardyń estetıkasy týraly óz túıgen tanymdy beıneleýge búkil ómirin arnady. Onyń bul baǵytta qol jetkizgen jetistikteri aýqymdy, laıyqty shákirtter shoǵyryn tárbıeledi», degen Máýlen Áshimbaev óner qaıratkerine alǵysyn bildirdi.
Senat tóraǵasy sonymen qatar «Uly dala sazy» kórmesi ulttyq kodty saqtaý turǵysynan asa mańyzdy ról atqaratynyn atap ótti.
«QR О́ner akademııasy» qoǵamdyq qory» Qazaqstan aýmaǵynda da, odan tys jerlerde de túrli kórmeler ótkizýde belsendi qyzmet atqaryp keledi.
«Uly Dala sazy» kórmesi Qazaqstannyń beıneleý ónerin keńinen qanat jaıýy jáne Akademııa músheleriniń shyǵarmashylyǵyn dáripteý maqsatynda ótkizilip otyr.
Kórmeniń ashylý saltanatyna Mádenıet jáne sport mınıstri Dáýren Abaev, Astana qalasynyń ákimi Altaı Kólginov, dıplomatııalyq korpýs pen shyǵarmashylyq zııaly qaýym ókilderi, memleket jáne qoǵam qaıratkerleri, mádenıettanýshylar qatysty.