Respublica partııasy Qazaqstanda ótken respýblıkalyq referendýmnyń qorytyndysyna qatysty resmı málimdeme jasady. Qujatty partııa tóraǵasy Aıdarbek Qojanazarov daýys berý nátıjelerin talqylaýǵa arnalǵan partııa fraksııasynyń keńeıtilgen otyrysynda jarııa etti, dep habarlaıdy Egemen.kz.
Jıynǵa partııanyń Májilistegi fraksııa depýtattary, Ortalyq apparat pen óńirlik fılıaldardyń ókilderi, sondaı-aq ReJastary jáne ReWomen partııalyq qoǵamdastyqtarynyń belsendileri qatysty.
Otyrysty ashqan partııa tóraǵasy ótken referendýmnyń eldiń saıası damýyndaǵy mańyzdy beles bolǵanyn atap ótti. Mıllıondaǵan qazaqstandyq strategııalyq tańdaýdyń mánin tereń túsinip, saılaý ýchaskelerine bardy. Daýys berýge saılaýshylardyń 73,12 paıyzy, ıaǵnı 9,1 mıllıonnan astam azamat qatysty.
«Bul – qazaqstandyqtardyń el bolashaǵyn aıqyndaýǵa belsene aralasýǵa daıyn ekenin kórsetetin joǵary azamattyq belsendilik. Referendýmǵa shyǵarylǵan sheshimdi daýys berýge qatysqandardyń 87,15 paıyzy, ıaǵnı shamamen 8 mıllıon azamat qoldady. Bul kórsetkishter qoǵamnyń memlekettik damý baǵyty tóńireginde toptasqanyn aıqyn kórsetip, qoǵamdyq senimniń berik mandatyn bildiredi», dedi Aıdarbek Qojanazarov.
Onyń aıtýynsha, qabyldanǵan ózgerister saıası ınstıtýttardy jańartýǵa, demokratııalyq tetikterdi nyǵaıtýǵa jáne azamattardyń memlekettik sheshimder qabyldaý úderisine qatysý múmkindigin keńeıtýge jol ashady.
Partııa tóraǵasy referendýmǵa daıyndyq kezeńinde Respublica partııasynyń atqarǵan jumysyna da toqtaldy.
«Bizdiń partııa úshin bul jumys daýys berý kúninen áldeqaıda buryn bastaldy. Biz parlamenttik reformalardy talqylaýǵa qatysyp, Konstıtýsııalyq komıssııa quramynda, keıinnen Jalpyulttyq koalısııa aıasynda jumys istedik. Partııa belsendileri men óńirlik fılıaldar búkil el boıynsha bir jarym myńnan astam kezdesý ótkizip, konstıtýsııalyq ózgeristerdiń ekonomıkaǵa, kásipkerlikke, áleýmettik ınfraqurylymǵa jáne óńirlerdiń damýyna yqpalyn túsindirdi», dedi partııa tóraǵasy.
Aıdarbek Qojanazarovtyń aıtýynsha, qazirgi kezeńdegi basty mindet – qoǵamdaǵy birlikti saqtaý jáne qabyldanǵan sheshimderdi naqty iske asyrý.
«Memlekettik ınstıtýttardyń, saıası partııalardyń jáne azamattyq qoǵamnyń aldynda ortaq mindet tur. Ol – eldiń turaqty damýyn qamtamasyz etý, memlekettik ınstıtýttardy nyǵaıtý jáne azamattardyń ómir súrý sapasyn arttyrý», dedi ol.
Otyrystyń qorytyndysy boıynsha Respublica partııasy qabyldanǵan sheshimderdi zańnamalyq turǵydan qamtamasyz etýge, sondaı-aq ekonomıkany damytýǵa, azamattardyń quqyqtaryn qorǵaýǵa jáne qoǵamnyń ál-aýqatyn arttyrýǵa baǵyttalǵan bastamalardy júıeli túrde qoldaýǵa daıyn ekenin rastady.
Memleket basshysy: 15 naýryz – Konstıtýsııa kúni bolyp belgilenedi
Aıta keteıik, 15 naýryzda Qazaqstanda jańa Konstıtýsııany qabyldaý máselesine arnalǵan respýblıkalyq referendým ótti. Eldiń barlyq óńirinde, sondaı-aq sheteldegi Qazaqstan Respýblıkasynyń dıplomatııalyq ókildikterinde daýys berý ýchaskeleri ashyldy. Qazaqstandyqtar «konstıtýsııalyq reformany qoldaı ma, álde qoldamaı ma» degen suraqqa jaýap berdi.
Aýmaqtyq komıssııalardyń derekterine sáıkes, eldiń barlyq óńirinde referendýmǵa 9 126 850 qazaqstandyq kelip daýys bergen. Aldyn ala málimet boıynsha, referendýmdaǵy jalpy qatysý deńgeıi 73,24% boldy.