Kókshetaýlyqtar jyly jaqqa usha almaı qalǵan suńqyldaq aqqýdy aman alyp qaldy. Endi aqqý Býrabaı kentindegi zoologııalyq baqta qystap shyǵady, dep jazady Egemen.kz.
Qyzyl kitapqa engen qus kóktemge deıin Prezıdenttiń Is Basqarmasyna qarasty «Býrabaı Damý» JShS baǵyp-qaǵady.
Álsirep, usha almaı qalǵan qusty Kókshetaý qalasynyń turǵyndary kórip, jergilikti polısııany shaqyrǵan. Polıseıler tabıǵat qorǵaýshy áiptesterine habarlaǵan. Sóıtip, oqa jaǵalylar men Aqmola oblysynyń orman sharýashylyǵy jáne janýarlar dúnıesi ınspeksııasynyń qyzmetkerleri aqqýdy Býrabaıdaǵy zoologııalyq baqqa jetkizgen.
– Balapan aqqýdy veterınarııalyq tekserýden ótkizip, qabyldap aldyq. Qatty qorqyp qalǵany bolmasa, zaqymdanǵan jeri joq. Súıegi saý, bulshyqeti bútin. Bıyl bizde qystap shyqsa, kóktemde erkine jiberemiz, – deıdi veterınar Ildar Faızýlın.
Aıta keteıik, «Býrabaı» memlekettik ulttyq parkinde qustyń 197 túri bar, olardyń 14-i Qyzyl kitapqa engen. Suńqyldaq aqqý da sırek kezdesetin qanattylardyń biri. Bul - maqtadaı appaq, tek tumsyǵynyń ushy ǵana sarǵylt bolyp keletin erekshe qus. Býrabaıdaǵy zoobaqqa ákelingen aqqý eseımegendikten, qanat-qaýyrysyndary áli tolyq aǵara qoımaǵan.