Qazaqstanda jalaqynyń ortasha máni 2022 jyldyń III toqsanynda 299 782 teńgeni qurady, dep habarlaıdy Egemen.kz Ulttyq statıstıka bıýrosynyń baspasóz qyzmetine silteme jasap.
Bul byltyrǵymen salystyrǵanda ósim 23,0%-dy, naqty mánde – 5,8%-dy quraıdy. Jalaqynyń medıanalyq máni (jalaqy qatarynyń ortalyq deńgeıi) 2022 jylǵy III toqsanda baǵalaý boıynsha 189 018 teńgeni qurady.
Eńbek statıstıkasy jáne ómir súrý deńgeıi departamentiniń dırektory Natalıa Belonosova túsindirgendeı, aldyńǵy toqsanmen salystyrǵanda III toqsandaǵy jalaqy deńgeıi ádette tómendep otyrady. Bul úrdis jyl saıyn ekinshi toqsan ýaqytyna dóp túsetin maýsymdyq (demalys tólemderi, maýsymdyq jumystar) jaıttarǵa baılanysty.
«Ekinshi toqsanmen salystyrǵanda jalaqy deńgeıi 3,9 paıyzdyq tarmaqqa tómendedi. Mundaı ózgerister jyl saıyn baıqalady. Jalaqynyń ortasha mánin esepteý kezinde tabys salyǵy, zeınetaqy jáne basqa da áleýmettik aýdarymdar sııaqty tólemderdiń barlyq túri eskeriledi», deıdi Natalıa Belonosova.
Jalaqynyń ósý dınamıkasy barlyq salada baıqalǵan. 2021 jylmen salystyrǵanda eń joǵary ósim – qurylys salasynda 34,5%, aýyl, orman jáne balyq sharýashylyǵy – 31,3%, kólik jáne qoımalaý – 31,1% bolǵan. Al tómen kórsetkish densaýlyq saqtaý (5,5%) men halyqqa áleýmettik qyzmet kórsetý (8,9%) salasynda kórinis tapqan.