Qazaqstandaǵy BUU Damý baǵdarlamasy (BUUDB) SKILLS UP atty óńirlik jastar hakatondarynyń legin ótkizýdi bastady.
Hakaton dep otyrǵanymyz aǵylshynnyń «hacker» jáne «marathon» sózderinen quralǵan, baǵdarlama jasaqtaýshylardyń, baǵdarlamalarmen qamtamasyz etý salasynyń túrli mamandaryn biriktire otyryp, qandaı da bir máseleni sheshý maqsatynda ortaq is úshin uıymdastyrylatyn shara.
Bizdegi hakatondar – HHI ǵasyr daǵdylary men quzyretteri týraly habardarlyqty arttyryp, jastardy STEM (jaratylystaný ǵylymdary, tehnologııalar, ınjenerııa jáne matematıka) mamandyqtaryna tartýdy, sıfrly jáne kásipkerlik mashyqtardy damytý arqyly ómirdiń oń ssenarıılerine qulshyndyrýdy kózdeıdi.
Jahandyq bilim ındeksine sáıkes, búginde Qazaqstan 154 eldiń ishinde 78-shi orynda tur. Elde bilimmen qamtýdyń deńgeıi joǵary bolsa da, ǴZTKJ men ınnovasııalar boıynsha kórsetkishter de kóńil kónshitpeıdi (154-ten 124-shi oryn). Qazaqstandaǵy túrli salalar men kompanııalardyń mashyqtarǵa degen suranystary men jastardyń qandaı bilimdi ıgeretini arasyndaǵy alshaqtyq aıqyn kórinedi. Qubylmaly álemde eńbek naryǵyna qazirgi syn-tegeýrinderdiń ınnovasııalyq jáne tehnologııalyq sheshimderin usyna alatyn mamandarmen qamtamasyz etý mindeti Qazaqstan úshin de ózekti.
«Búgingi tańda bilimge negizdelgen ósý adam damýynyń negizi, jańalyqtar men ınnovasııalardyń qozǵaýshy kúshi bolyp otyr. Sondyqtan ulttyq áriptesterimen birge BUUDB basty daǵdylardy, tehnologııalyq betalys, ınnovasııalardy, sondaı-aq bilimge negizdelgen ekonomıkany qurý úshin bilim berý qyzmetterin usynýdyń jańa tásilderin talqylaý úshin Bilim aptalyǵy platformasyn quryp otyr», deıdi Qazaqstandaǵy BUUDB Turaqty ókiliniń mindetin atqarýshy Sýhrob Hodjımatov.
Al SKILLS UP jastar hakatony bıyl jeltoqsan aıynda BUUDB qoldaýymen ótetin 2022 Ulttyq bilim aptalyǵynyń negizgi kezeńderiniń biri. Birinshi óńirlik hakaton Mańǵystaý oblysynyń Aqtaý qalasyndaǵy Sh.Esenov atyndaǵy Kaspıı tehnologııalar jáne ınjınırıng ýnıversıtetinde ótse, kelesi úsheýi Túrkistan (10 qarasha), Qaraǵandy (14 qarasha) qalalary men Shyǵys Qazaqstan oblysynda (16 qarasha) ótpek. Árbir hakatonda úsh jeńimpaz top anyqtalyp, iriktelgen 12 top Almaty qalasynda ótetin sheshýshi saıys kezinde bas júlde – startapty iske asyrýǵa arnalǵan grant úshin kúresý múmkindigine ıe bolmaq.
О́ńirlik hakatondar qarsańynda tirkelgen 500-den astam qatysýshy onlaın-qarqyndy bilim berý aptalyǵyna qatysty. Olar úshin ıdeıalar men gıpotezalardy tekserýden bastap bıznes-modelder men prototıpter jasaýǵa deıingi, nólden bastap startap qurýdyń sheberlik synyptary uıymdastyryldy. Sonymen qatar ıntensıv kezinde monetızasııa strategııalaryn qurý, no-code ázirleý jáne Arduino-da prototıpteý boıynsha sabaqtar ótkizildi.