Memleket basshysy Eýropalyq Odaqtyń Syrtqy ister jáne qaýipsizdik saıasaty jónindegi Joǵarǵy ókili – Eýropalyq Komıssııanyń vıse-prezıdenti Jozep Borrelmen kezdesti, dep habarlaıdy Egemen.kz Prezıdenttiń baspasóz qyzmetine silteme jasap.
Qasym-Jomart Toqaev Jozep Borrelge iltıpat bildire otyryp, onyń Astanaǵa sapary Qazaqstan men Eýroodaq arasyndaǵy qarym-qatynastardy nyǵaıtý turǵysynan óte mańyzdy ekenin atap ótti.
Prezıdent Qazaqstan men Eýropalyq Odaq arasyndaǵy Keńeıtilgen seriktestik pen yntymaqtastyq týraly kelisim barlyq saladaǵy yntymaqtastyqty tereńdetýdiń jańa kezeńine jol ashqanyn aıtty.
«Biz Qazaqstan men Eýroodaq arasyndaǵy joǵary deńgeıdegi baılanystardy qoldaımyz. Osyǵan baılanysty Eýropalyq Keńestiń Prezıdenti Sharl Mısheldiń óte tabysty bolǵan saparyn jáne Eýropalyq Komıssııanyń prezıdenti Ýrsýla fon der Lıaıenmen júrgizgen kelissózimdi atap ótkim keledi. Biz yntymaqtastyǵymyzdyń kóptegen máselesi boıynsha ózara túsinistikke qol jetkizdik dep oılaımyn. Sondaı-aq Egıpette Qazaqstan Premer-Mınıstri men Ýrsýla fon der Lıaıen qol qoıǵan Memorandýmdy quptaımyn. Bul – ózara yntymaqtastyq turǵysynan óte naqty qadam», dedi Memleket basshysy.
О́z kezeginde Jozep Borrel Qasym-Jomart Toqaevqa qurmet kórsete otyryp qabyldaǵany úshin alǵys aıtyp, Astana men Brıýssel arasyndaǵy ózara qarym-qatynastardyń qarqyndy damyp kele jatqanyn atap ótti.
«Eýroodaq pen Qazaqstan – jaqsy seriktester. Biz ózara senim men qurmet kórsete otyryp, ortaq syn-qaterler týraly aıtamyz. Sizder Qazaqstandy ashyq, ınklıýzıvti jáne demokratııalyq el etý úshin ózgerister jasaýǵa baǵyttalǵan reformalar úderisin bastadyńyzdar. Meniń saparym osy óte mańyzdy kezeńmen tuspa-tus kelip otyr», dedi Eýropalyq Odaqtyń Joǵarǵy ókili.
Kezdesý barysynda Qazaqstan men Eýropalyq Odaq arasyndaǵy ekonomıkalyq jáne ınvestısııalyq baılanystardy odan ári nyǵaıtý perspektıvalary talqylandy.