Prezıdenttikke kandıdat Qaraqat Ábden Taraz qalasynyń «Januıa» emhanasynda saılaýaldy kezdesý ótkizdi. Kezdesýge áleýmettik sala jáne medısına qyzmetkerleri qatysty.
Basqosý barysynda qoǵamdaǵy ózekti suraqtar men áleýmettik qyzmetkerlerdiń máseleleri talqylandy. Qaraqat Ábden bul salanyń mańyzdylyǵyn tilge tıek etip, áleýmettik qyzmettiń negizgi máselelerine toqtaldy.
«Áleýmettik kómekke muqtaj adamdardyń sany artyp keledi, biraq elimizde kásibı áleýmettik qyzmetkerler jetispeıdi. Zańnamaǵa qajetti ózgeristerdi engize otyryp, áleýmettik qyzmetkerdiń mártebesin kóteretin kez keldi dep sanaımyn. Bizdiń qoǵam olardyń jumysyn tıisti deńgeıde baǵalamaıdy. Mysaly, bıyl osy mamandyqqa bólingen 100 bilim berý granty boıynsha tek 35 adam ǵana oqýǵa túsýge nıet bildirdi. Mamandyqtyń mártebesin arttyrý maqsatynda el ishinde jan-jaqty aqparattyq-nasıhattaý jumysyn júrgizý kerek. Kásibı áleýmettik qyzmetkerlerdi daıarlaý úshin arnaıy ınstıtýtty nemese joǵary oqý oryndarynda kafedralar men fakýltetterdi qurýdy usynamyn. Ǵylym jáne joǵary bilim mınıstrligi tarapynan «áleýmettik qyzmetker» mamandyǵy boıynsha arnaıy bilim berý standarty ázirlenýge tıis», dedi kandıdat.