Chılılik «ME-Elecmetal» kompanııasy taý-ken óndirisi salasynda shıkizatty Qytaıdaǵy ken ornynan jetkizip, Jetisý aımaǵynda óńdeý isimen aınalyspaq. Olardyń jylyna 100-140 myń tonna joǵary sapaly ónim óndirý jospary bar.
Chılılik kásipkerler Jetisý oblysynyń ákimi Beıbit Isabaevpen kezdesý barysynda Qazaqstanmen seriktestik baılanys ornatyp, ınvestısııa salýǵa nıetti ekendikterin jetkizdi. Jetisýǵa óz kásiporyndaryn ornalastyratyn jáne jumysyn júrgizetin laıyqty óndiristik alań izdeý maqsatymen kelgenin de jasyrmady.
Jetisý oblysy ákimi baspasóz qyzmetiniń málimetinshe, «ME-Elecmetal» kompanııasy taý-ken óndirisi salasynda dıirmen qaptamalaryn shyǵarýda óndiristik qýaty men ónim shyǵarý kólemi jaǵynan álemde kóshbasshy sanalady. Atalǵan kompanııa ókilderi shıkizatty Qytaıdaǵy ken ornynan jetkizip, Jetisý jerinde óńdeýdi kózdep otyr. Olardyń jylyna 100-140 myń tonna joǵary sapaly ónim óndirý jospary bar. Daıyn ónimdi ótkizýde negizinen «KAZ Minerals» kompanııasymen seriktes bolatyndaryn aıtady. «Taldyqorǵan» ındýstrıaldy aımaǵynyń barlyq qajetti ınfraqurylymdarmen qamtylýy Chılı kásipkerleriniń qyzyǵýshylyǵyn týǵyzǵan.
«KAZ Minerals» kompanııasymen kelisimshart jasasamyz. Sizderge usynylyp otyrǵan jobamyzdy dırektorlar keńesi bizge bekitip beredi. Sodan keıin naqty qadamdar jasaýǵa ázirmiz», deıdi «ME-Elecmetal» birlesken kompanııasynyń ókili, usatý bóliminiń aǵa atqarýshy vıse-prezıdenti Zen Jý myrza.
Oblys ákimi Beıbit Isabaev resmı qonaqtarǵa jyly lebizin bildirip, elimizdiń, sonyń ishinde Jetisý aımaǵynyń logıstıkalyq múmkindikteri mol ekenine toqtalyp ótti. Sondaı-aq «Taldyqorǵan» ındýstrıaldy aımaǵynda óndiristi damytýǵa qajetti barlyq ınfraqurylym júıeleri jasalǵanyn aıtty. Bul óz kezeginde óńirdiń ınvestısııalyq tartymdylyǵyn arttyrýǵa múmkindik beredi. Jobanyń aımaqqa tıimdiligi turǵysyndaǵy birqatar jaıtty pysyqtaǵan oblys ákimi óz tarapynan qajetti qoldaý kórsetetinin bildirdi.
«Sizdermen seriktes bolýǵa peıildimiz. Degenmen koronavırýsty jáne basqa da sebepterdi alǵa tartyp, keı jobalardyń iske asyrylýyn uzatyp alǵan ınvestorlar da bar. Bizge jobalardyń ýaqytynda júzege asyrylǵany jáne onyń óz tıimdiligin kórsetkeni kerek. Ol úshin jergilikti atqarýshy organǵa qatysty jumystardy der kezinde atqarýǵa múddelimiz. Barlyq qujattyq rásimder aıaqtalǵanda taǵy bir kezdesip, jobanyń jaı-japsaryn egjeı-tegjeıli talqylaýǵa ázirmiz», dedi B.Isabaev.
Jetisý oblysy