60 myń sóz qamtyǵan, jalpy kólemi 1 300 bettik qazaqsha-aǵylshynsha jáne aǵylshynsha-qazaqsha oksford sózdiginiń tuńǵysh basylymyn Qazaqstan Prezıdenti Q.K.Toqaevtyń tapsyrmasymen «Ulttyq aýdarma bıýrosy» daıyndady. Bul týraly joba jetekshisi Raýan Kenjehanuly áleýmettik jelidegi paraqshasynda jazdy.
Álemge tanymal Oxford University Press baspasy ekitildi oxford qazaq dictionary sózdigin basyp shyǵarýǵa resmı ruqsatyn berdi. Sózdikti ázirleýde dúnıe júzine tanymal Oxford English Dictionary sózdigin qurastyrý ádistemesi men tehnologııasy negizge alyndy.
Sózdik qurastyrý jumysy tórt jyl úzdiksiz júrip, oǵan qazaq jáne aǵylshyn tiliniń leksıkasyna mamandanǵan 50-den asa tájirıbeli tilshi atsalysty. Sózdikti jetildirýge Ahmet Baıtursynuly atyndaǵy Til bilimi ınstıtýtynyń mamandary qatysyp, sózdik ınstıtýt ǵylymı keńesiniń saraptamasynan ótti.
Sózdik qurastyrý aıasynda qazaq jáne aǵylshyn tili leksıkasyndaǵy ózgerister, ásirese qazirgi mádenıet, aqparattyq tehnologııalar, medısına, ekonomıka, qarjy men saýda salalaryndaǵy jańalyqtar eskerildi. Sondaı-aq sózdikte aǵylshyn jáne qazaq tilderiniń grammatıkasy men dybystaý, emle erejeleri túsindiriletin qysqasha nusqaýlyqtar, qazaq tilindegi iskerlik jáne elektrondy hat-habar jazý úlgileri berildi.
Sonymen birge, osy sózdik negizinde qazaq tili Oxford Global Languages platformasyna qosylady. Bul bastamanyń maqsaty – álemniń iri de, irgeli 100 tiliniń leksıkalyq qoryn ózara baılanystyryp, ortaq ǵalamdyq til korpýsyn jasaqtaý. Ol týraly keńinen qosymsha habarlaımyz.
Qazaq tilin álemdegi eń tanymal ári eń bedeldi sózdikter jelisimen baılanystyryp, ǵalamdyq lıngvıstıkalyq ortaǵa qosatyn bul sózdik ana tilimizdi qoldaý jáne zamanǵa saı damytý jolyndaǵy úlken qadam dep bilemiz.
Osy mańyzdy jobaǵa qoldaý bildirgen Prezıdent Q.K.Toqaevtyń tapsyrmasyna sáıkes, sózdik keń kólemde basylyp, elimizdiń oqý oryndary men kitaphanalaryna taratylady.
Osy jobaǵa qatysyp, asa aýqymdy da kúrdeli jumysqa atsalysqan barsha áriptesterimizge alǵys aıtamyz!, deıdi R.Kenjehanuly.