Fýtboldan álem chempıonaty bastalǵaly eki-úsh kún ǵana ótti. Desek te sol aralyqtyń ózinde buryn-sońdy bolmaǵan birneshe qyzyqty jaıttar tirkeldi.
Birinshisi – Qatar men Ekvador arasyndaǵy match 2:0 esebimen Ońtústik Amerıkadan kelgen komandanyń jeńisimen aıaqtalǵany belgili. Eger tarıhqa júginsek, jarys qojaıyndary buǵan deıingi álem chempıonattarynyń birde-bir tusaýkeser kezdesýinde utylmaǵan. Osyǵan deıingi básekelerdiń16-synda alań ıeleri basymdyq tanytsa, altaýy teń eseppen aıaqtalǵan. Al joly bul sol statıstıka buzylyp, Qatar óz jerinde qarsylasyna ese jiberdi. Ekinshisi – dál sol oıynda alǵashqy gol 11 metrlik núkteden qaqpaǵa endi. Buǵan deıingi jarystardyń eshqaısysynda alǵashqy gol penaltıden soǵylmaǵan edi. Úshinshisi – Anglııa men Iran arasyndaǵy kezdesý 117 mınýtqa sozyldy. Iran quramasynyń qaqpashysy Alıreza Beıranvandtyń jaraqat alýyna baılanysty tóreshi birinshi taımǵa baqandaı 14 mınýt qosty. Ekinshi taımnyń negizgi ýaqyty aıaqtalǵannan keıin qos komanda taǵy 13 mınýt oınady. Al onyń aldyndaǵy Qatar men Ekvador arasyndaǵy match 100 mınýtqa sozylǵan edi.
AQSh pen Ýels arasyndaǵy báseke 1:1 esebimen aıaqtalǵany belgili. Amerıkalyqtardyń sapynda Tımotı Vea gol soqty. Onyń ákesi Djordj Vea kezinde teńbil doptyń teńdessiz sheberi bolǵan. Ol Lıberııa quramasy sapynda óner kórsetip, úsh ret Afrıkanyń eń úzdik fýtbolshysy atandy. 1995 jyly «Altyn dopty» ıelendi. Vea – qara qurlyq fýtbolynyń tarıhyndaǵy osyndaı ataqqa qol jetkizgen tuńǵysh jáne ázirge jalǵyz oıynshy. О́ziniń sporttyq karerasynda Djordj PSJ, «Mılan», «Chelsı» sekildi beldi klýbtarda oınap, kóptegen bıik belesti baǵyndyrdy. Úlken sportpen qoshtasqannan keıin saıasatpen aınalysty. 2017 jyly ol Lıberııanyń prezıdenti bolyp saılandy. Onyń úlken uly da fýtbolshy. Kishi Djordj Vea AQSh quramasy sapynda eki oıyn ótkizip, Eýropanyń birqatar klýbynyń namysyn qorǵady. Al Tımotı Veanyń ózi 2000 jyldyń 22 aqpanynda AQSh-tyń Nıý-Iork qalasynda dúnıege keldi. Ol Fransııanyń PSJ-sy men Shotlandııanyń «Seltıginde» oınap, 2019 jyly «Lılldiń» jeıdesin kıdi. Byltyr Tımotı Fransııa chempıony atanyp, el sýperkýbogin ıelendi. 2018 jyldan beri Vea AQSh-tyń ulttyq quramasy sapynda óner kórsetedi.
Nemisterdiń Transfermarkt veb-saıty bul kúnderi fýtboldan Qatarda ótip jatqan álem chempıonatyndaǵy eń qymbat ulttyq qurama komandalardyń tizimin jarııalady. Úzdikter kóshin Anglııa quramasy bastap tur. Aǵylshyndardyń barlyq oıynshynyń jalpy quny – 1,26 mıllıard eýro. Solardyń arasyndaǵy eń qundysy – Fıl Foden. 22 jastaǵy «Manchester Sıtıdiń» jartylaı qorǵaýshysy 110 mıllıon eýroǵa baǵalanyp otyr. Odan keıingi satylarǵa Djýd Bellıngem (100 mıllıon), Bakaıo Saka men Harrı Keın (90 mıllıon), Deklan Raıs (80 mıllıon), Meıson Maýnt (75 mıllıon), Rahım Sterlıng, Djek Grılısh jáne Trent Aleksander-Arnold (70 mıllıon) syndy teńbil dop sheberleri jaıǵasty. Ekinshi jáne úshinshi oryndarda – Brazılııa men Fransııa. Bul memleketterdiń fýtbolshylary 1,14 jáne 1,03 mıllıard shamasynda. Brazılııanyń betkeustary Vınısıýs Jýnıor 120 mıllıonǵa baǵalansa, fransýzdardyń dúldúli Kılıan Mbappeniń transferlik quny 160 mıllıon eýrony qurap otyr. Sondaı-aq TOP-10 komandanyń qatarynda Portýgalııa (€ 937 mln), Germanııa (€ 886 mln), Ispanııa (€ 872 mln), Argentına (€ 645 mln), Nıderland (€ 587 mln), Belgııa (€ 563 mln) jáne Ýrýgvaı (€ 450 mln) quramalary bar.
Áıgili NBC Sports saıty álemdik dop dodasynyń eń úzdik oıynshylarynyń reıtıngin jarııalady. Bul tizimde Lıonel Messı kósh bastap tur. 35 jastaǵy Argentına quramasynyń surmergeni óz eliniń ulttyq quramasy sapynda sonaý 2005 jyldan beri óner kórsetip keledi. Sol aralyqta ol 165 ret jasyl alańǵa shyǵyp, 91 goldyń avtory atandy. Ekinshi orynda – Kılıan Mbappe. 23 jastaǵy Fransııanyń juldyzy alǵash ret 2017 jyly ulttyq komandanyń jeıdesin kıgen edi. Bes jyl aralyǵynda ol 58 oıynǵa qatysyp, 28 ret qarsylastar qaqpasyn dál kózdedi. Úshinshi satyǵa Kevın De Brıoıne jaıǵasty. 31 jastaǵy jartylaı qorǵaýshynyń Belgııa quramasy sapynda oınap júrgenine 12 jyldan asty. Sol kezden beri 92 matchta alańǵa shyqqan ol 25 márte mergendik tanytty. Sondaı-aq TOP-10 fýtbolshynyń qatarynda Kárim Benzema (Fransııa), Neımar (Brazılııa), Harrı Keın (Anglııa), Sadıo Mane (Senegal), Alısson (Brazılııa), Robert Levandovskı (Polsha) jáne Vınısıýs Jýnıor (Brazılııa) syndy sańlaqtar bar. Al Portýgalııanyń ataqty oıynshysy Krıshtıaný Ronaldý 11-satyǵa jaıǵasty.