Sońǵy kúnderi fýtboldan Qatarda ótip jatqan álem chempıonatyndaǵy tórt oıyndy tamashaladyq. Alǵashqy match «S» tobyndaǵy Argentına men Saýd Arabııasy quramalary arasynda ótti. Iá, Ońtústik Amerıkadan kelgen komanda atalǵan jarystardyń basty favorıtteriniń biri ekeni sózsiz. Al Caýdııa – taza aýtsaıder. Osy báseke ótkenge deıin maıtalman mamandardan bastap, mıllıondaǵan jankúıerge deıin dál osyndaı pikirde edi.
Joǵaryda atalǵan qos komandanyń oıynyn tamashalaý úshin 88 012 kórermen Lýsaıldegi «Ulttyq stadıonǵa» jınaldy. Resmı derekterge súıensek, bul sporttyq nysan 80 000 kórermenge ǵana eseptelgen. Onyń syrtyndaǵy segiz myńnan astam adamdy atalǵan stadıonnyń qyzmetkerleri qaı jerge syıdyrǵany bizge beımálim. Ol jaıynda eshbir jerde aıtylǵan da, jazylǵan da joq. Desek te sol oıynnyń kýási bolǵandar osy «ymyrasyz aıqastan» keremet áser alyp, úıdi-úıleri men meımanhanalaryna kóterińki kóńil kúıde tarasqany anyq. Bul keshte tek argentınalyq jankúıerler men Lıonel Messıdiń tileýlesteri ǵana muńaıdy.
Báseke birden Argentına fýtbolshylarynyń ekpindi shabýylymen bastaldy. Shabýyl shebinde Messı, Anhel Dı Marııa, Laýtaro Martınes syndy sheberleri bar asa azýly komanda báseke bastalǵan bette-aq Saýd Arabııasy quramasynyń tas-talqanyn shyǵarýǵa bekindi. Alǵashqy gol da kóp kúttirgen joq. 10 mınýtta qarsylastar qaqpasyna penaltı belgilendi. 11 metrlik núktege Messıdiń ózi keldi. Argentınanyń baǵyna týǵan ul múlt ketken joq – 1:0.
Árıne, aýtsaıderge qarsy oıynda argentınalyqtardyń bir ǵana goldy qanaǵat tuta qoımaıtyny anyq. Tolassyz shabýyl odan keıin de bir báseńdegen joq. Birinshi taımnyń ózinde olar taǵy úsh márte nysanany dál kózdedi. Biraq slovenııalyq tóreshi Slavko Vınchıch bul goldardyń eshqaısyn esepke almady. О́ıtkeni olardyń barlyǵy da offsaıttan soǵyldy. Jalpy, sol 45 mınýt aralyǵynda Lıonel Skalonıdiń shákirtteri oıynnan jeti ret tys qaldy. Sonymen qatar Mohammed Ál-Ývaıstyń da minsiz oıynyn atap ótýge tıispiz. «Ál-Hılıaldiń» 31 jastaǵy qaqpashysy keremet seıvter jasap, keminde bes ret óz komandasyn asa qaýipti jaǵdaıdan qutqaryp qaldy.
Saýdııalyqtar da ara-tura shabýyldady. Biraq negizinen olar kóp kúshterin qorǵanysqa jumsap, óz qaqpalaryna taǵy gol jiberip almaýdyń qamyn kóbirek oılady.
Úzilis kezinde 54 jastaǵy fransýz mamany Erve Renardyń óz shákirtterine ne aıtqany beımálim. Bir anyǵy, 15 mınýttan keıin biz múlde basqa Saýd Arabııasyn kórdik. Ekinshi taım bastalǵan bette Saleh Ál-Shehrı tarazy basyn teńestirse, kóp keshikpeı Sálem Ál-Davsarı óz komandasyn alǵa shyǵardy – 1:2. Bas-aıaǵy tórt-bes mınýt aralyǵynda eki gol soqqan Azııa qurlyǵynyń ókilderi odan keıin Argentına fýtbolshylarynyń erkin kósilýine esh múmkindik bermedi. О́te saýatty qorǵanǵan olar barlyq qaýiptiń betin qaıtaryp, ózderine qajetti esepti matchtyń sońyna deıin saqtap qaldy. Osylaısha, jer-jahandaǵy san mıllıon jankúıer HHII álem chempıonatyndaǵy alǵashqy sensasııanyń kýási boldy.
Joǵaryda atalǵan matchtyń shıelenisti ótkeni sonshalyq, Argentına quramasy shabýyldaǵan sátterdiń birinde dopty keri qaıtarý úshin janushyra alǵa umtyla sekirgen saýdııalyqtardyń qaqpashysy Mohammed Ál-Ývaıs óziniń komandalasyn tizesimen qatty soǵyp ótti. Basynan alǵan soqqydan keıin Iаsır Ál-Shahranı kópke deıin esin jııa almaı, jasyl alańda jatty. Ony dárigerler zembilge salyp áketti. Keıin belgili bolǵandaı, onyń jaǵy synyp, bet súıekteri qatty shytynap ketken eken. Osy oqıǵadan keıin Saýdııa bıligi qorǵaýshyny jeke ushaqpen Germanııaǵa jetkizýdi uıǵardy. Qazirgi kezde Iаsırge operasııa jasalmaq. Mine, keıde jeńiske jetý jolynda osyndaı táýekelge de barýǵa týra keledi.
«S» tobyndaǵy Meksıka men Polsha jáne «D» tobyndaǵy Danııa men Týnıs quramalary arasyndaǵy kezdesýde esep ashylǵan joq – 0:0. Sársenbiden seısenbige qaraǵan túni Fransııa men Aýstralııa jasyl alańǵa shyqty. Dıde Deshamnyń shákirtteri qarsylastaryn mensinbedi me, álde jasyl qurlyqtyń ókilderi adýyndy boldy ma, áıteýir solar birinshi bolyp gol soqty. Metıý Lekodan jaqsy pas alǵan Kreıg Gýdvın dopty qaqpaǵa toǵytty. Tek sodan keıin ǵana es jıǵan fransýzdar birte-birte oıyn tizginin qolǵa aldy. 27 mınýtta Adrıana Rabo tarazy basyn teńestirse, arada bes mınýt ótken soń Olıve Jırý óz komandasyn alǵa shyǵardy.
Úzilisten keıin de álem chempıondarynyń basymdyǵy anyq baıqaldy. О́z oıynyn tapqan olar aýstralııalyqtardyń qaqpasyn taǵy eki márte dál kózdedi. 68-mınýtta Kılıan Mbappe mergendik tanytsa, 71-mınýtta Jırý dýbldiń avtory atandy. Sóıtip, bul match 4:1 esebimen aıaqtaldy.