Keshe Memlekettik hatshy – Syrtqy ister mınıstri Qanat Saýdabaevtyń tóraǵalyǵymen Memlekettik rámizder jónindegi respýblıkalyq komıssııanyń kezekti májilisi bolyp ótti. Atalǵan májilis jumysyna komıssııa músheleri, Parlament depýtattary, ýákiletti memlekettik organdar men qoǵamdyq uıymdardyń ókilderi qatysty.
Elimizde memlekettik rámizderdi paıdalaný jáne olardy qoldaný salasynda kóptegen jumystar atqaryldy. Búginde olardy tek el ishinde ǵana emes, búkil álem biledi desek artyq emes. Buǵan Elbasy da erekshe mán beredi. Sondyqtan da komıssııanyń búgingi otyrysy Memlekettik rámizder kúni men Konstıtýsııanyń 15 jyldyǵynyń qarsańynda ótip otyr. Bul aıryqsha máni bar sátter elimizdiń tarıhyndaǵy eleýli kezeńderge aınalǵany aqıqat. О́tken 18 jyl barysynda memlekettik rámizder elimizdi tanytýdyń jáne shetelge de táýelsiz Qazaqstannyń gúldenýiniń shynaıy shyndyǵyn kórsetýdiń kórinisi boldy, dedi Qanat Saýdabaev.
Memlekettik rámizderimizdiń mańyzy odan ári arta berýi úshin ony paıdalaný jónindegi jumystar jandana túsýge tıis. Osyǵan oraı otyrys barysynda Almaty qalasynyń, Qostanaı jáne Qyzylorda oblystary ákimderiniń, sondaı-aq Tótenshe jaǵdaılar mınıstrligi men Ekonomıkalyq qylmysqa jáne sybaılas jemqorlyqqa qarsy kúres agenttiginiń memlekettik rámizderdi paıdalaný jáne qoldaný boıynsha jumys tájirıbeleri jónindegi esepteri tyńdaldy.
Q.Saýdabaev rámizderdi paıdalaný jáne qoldaný salasynda ıek artqan ári belgilengen jumystardyń arqasynda qol jetken nátıjelerge qaramastan, kemshilikter men memlekettik rámizderdi tıisinshe qalyptasqan erejelerge saı paıdalanbaý derekteri kezdesetinin aıtty. Osyǵan oraı otyrysta memlekettik rámizderdi nasıhattaý jastarǵa patrıottyq tárbıe berýde asa mańyzdy ról atqaratyny erekshe ataldy.
Májilis sońynda komıssııa otyrysynyń qorytyndysy boıynsha hattamalyq sheshim qabyldandy jáne memlekettik organdarǵa memlekettik rámizder jónindegi zańnama qaǵıdalaryn buljytpaı saqtaý, sondaı-aq olardy paıdalanýdy baqylaýdyń tetikterin jetildirý týraly naqty tapsyrmalar berildi.
Aleksandr TASBOLATOV.