Demografııalyq dısbalansqa, aımaqtardyń arasyndaǵy tepe-teńdikke den qoıǵan «Qýatty óńirler – el damýynyń draıveri» ulttyq jobasynyń uǵynǵanǵa ult úshin máni asa zor. Ultqa qatysty osyndaı uly maqsatty kózdegen jobanyń iske asý merzimi – 2025 jylǵa deıin. Joba memleket tarapynan ońtústikten soltústikke óz qalaýymen turǵyndardyń kóship kelýine jaǵdaı jasaıdy.
Soltústikke, ortalyqqa kelemin deýshilerdi qoldap, kóshirip ákelýge memleket saqadaı saı. Olardyń úıi daıyn, jumysy ázir. Mamandyǵy joq bolsa, oqytýǵa taǵy múmkindik bar. Budan bólek, kóshi-qonnyń shyǵyny tolyq óteledi. Ár otbasynyń jan basyna 70 aılyq eseptik kórsetkish kóleminde kóterme aqy tólenedi. Qaraǵandy oblysy 2020 jyldan beri kóship kelýshilerdi qabyldaıtyn óńir qataryna kirdi. Al qaı aımaqtaǵy aǵaıyn Qaraǵandyǵa qaraı at arytýǵa ázir me? Qaraǵandy, Almaty, Jambyl, Mańǵystaý, Túrkistan, Qyzylorda oblystarynan, sondaı-aq Almaty, Shymkent, Astana qalalarynan kelemin degenderge qushaǵyn jaıyp otyr. Bul ánsheıin ádettegi kóshi-qon emes. Onyń astarynda erteńgi kúnimizge qam jegen saıasat bar, bilgenge...
Nura aýdanynyń Qaınar aýylyna Shymkentten kóship kelgen shańyraqqa qazirgi tańda aýyldaǵy «Qaınar» JShS arnaıy úı salyp jatyr. Aýyl ákimi Azamat Sadyqovtyń aıtýynsha, otbasyǵa úı salynyp bitkenshe 2 mln 800 myń teńgege baspana satyp alynǵan.
– Erli-zaıypty Baýyrjan Shamshıdınov pen Mádına Darbaeva maýsym aıynda kóship keldi. Mádınanyń mamandyǵy – terapevt dáriger. Búginde aýyldaǵy aýrýhananyń bas dárigeri. Joldasy – Baýyrjandy «Qaınar» JShS jumysqa aldy. Otbasyna kelgen bette 1 mln teńge kóterme tólense, «Qaınar» JShS úı salyp jatyr. Baspana qurylysy jańa jylǵa deıin aıaqtalady, – deıdi Qaınar aýylynyń ákimi A.Sadyqov.
Mádına Orazalyqyzynyń medısınadaǵy ótili 15 jyl eken. Densaýlyǵy syr bergen soń Qaraǵandy óńirine kóship kelýge bel baılaǵan.
– Densaýlyǵyma da baılanysty kóshýge týra keldi. Múmkin klımatty aýystyrsaq, ońalar degen úmit te boldy, – deıdi Mádına. Degenmen shyraıly Shymkentine elegizgen kóńili de syr berip qaldy.
Al Nura qarashanyń sońyna deıin Almaty oblysynan taǵy bir shańyraqty kútip otyr. Aýdannyń jumyspen qamtý jáne áleýmettik baǵdarlamalar bóliminiń basshysy Dınara Ermekovanyń aıtýynsha, ol otbasynda 6 adam bar. Baǵdarlama arqyly otbasynyń ár janyna 70 aılyq eseptik kórsetkish kóleminde tólem jasalyp, eger otbasy úıdi jaldaıtyn bolsa, onyń jaldaý aqysy, kommýnaldyq qyzmet tólemi tolyq óteledi.
Oblystyń ózge aýdandary da osynda qaraı kósh basyn burǵan aǵaıyndy qarsy alýǵa ázir. Mysaly, baǵdarlama arqyly tamyz aıynda Aqtoǵaı aýdanyna Almaty qalasynan, Almaty, Jambyl oblystarynan birneshe shańyraq kóship kelip, Aıyrtas aýylyna qonystanbaq.
Almatydan kelgen Janat Sámetovanyń mamandyǵy – medbıke. 10 jyl ótili bar. Qazir Aıyrtastyń medpýnktinde mamandyǵy boıynsha eńbek etip keledi.
– О́zim Qyzylorda oblysynyń týmasymyn. Biraq Almatyda jumys istedim. Qaraǵandyny tańdaý sebebim – oblys ózge óńirlerge qaraǵanda Qyzylordaǵa jaqyndaý. Sondyqtan Pavlodar sekildi ózge qalalarǵa barmadym. Aıyrtasqa kelgen soń úı, qyzmet berdi. Bári oıdaǵydaı, – deıdi Janat Sámetova.
Endigi másele – osy kelýshilerdiń Arqa jerin jatsynbaı, sýdaı sińip, tastaı batyp ketýinde. Bul da ulttyq jobanyń jemisin berýine kedergi keltiretin kiltıpan ekenin aıtpasqa amal joq. Sońyna jaltaqtap, alańdaǵandar da ile-shala keri kóship ketetini jasyryn emes. Ondaıda bıýdjetten shyqqan shyǵynnyń bárin óteıdi. Mundaǵy problema – qarajatta emes. Tereńirek úńilsek, atalǵan kóshtiń ulttyq saıasattaǵy salmaǵy tarazy tabaǵyn tóńkererdeı aýyr.
Qaraǵandy oblysy