Almaty qalasynyń oqýshylary Ulttyq biryńǵaı test tapsyrýda kórsetkishteri jaǵynan áli de kósh bastap tur. Búkil respýblıka boıynsha burnaǵy kúni birinshi bolyp eń joǵary ball jınaǵan Almaty qalasyndaǵy fızıka-matematıka pánderin tereńdete oqytatyn №178 lıseı túlegi Aıǵanym Ábdijapardan keıin, keshe ǵana Almatydaǵy №159 Y.Altynsarın atyndaǵy gımnazııanyń túlegi Ásııa Jandosqyzy Marat 125 ball jınap, mektebiniń de, ata-anasynyń da, ustazdarynyń da mereıin tasytty.
Aqıqatyn aıtqanda, Ásııa Abaı atyndaǵy Qazaq Ulttyq pedagogıkalyq ýnıversıtetiniń bazasynda birinshi kúni ótken UBT nátıjesinde 124 ball alǵany belgili bolyp, jaýaby durys emes dep eseptelingen jalǵyz suraqty appelıasııaǵa bergen. Keshe komıssııa túlektiń absolıýttik bilim nátıjesin kórsetkenin dáıektep berip, respýblıka boıynsha ekinshi joǵary ball jınaǵan onyń esimi naqtylandy.
Almatydaǵy №159 gımnazııa basqa da jetistikterimen maqtanyp júrgen bilim ordasy. Respýblıkalyq baıqaýlarda, ǵylymı jobalardyń jarystarynda, túrli mádenı sharalarda aldyńǵy qatardan tabylyp júrgen qaladaǵy mańdaıaldy bilim mekemeleriniń biri.
Bul bilim uıasynan bıyl 52 túlek UBT-ǵa qatysyp, olardyń UBT qorytyndysy boıynsha orta baly 109,7 boldy.
– Eger mektepten 13 oqýshy «Altyn belgiden» úmitker bolsa, sonyń 13-i de «Altyn belgisin» aqtady. Bir ǵana muǵalimimiz Gúlnaz Tuńǵyshbaevanyń synybynan 10 túlek «Altyn belgi» ıegeri atandy. Bul – óte úlken tabys. Qol jetken jetistik bir kúnniń eńbegi emes. Ol – ustaz, shákirt, ata-ana yntymaqtastyǵynyń nátıjesi, – deıdi №159 Y.Altynsarın atyndaǵy gımnazııanyń dırektory, Qazaqstannyń Eńbek Eri Aıagúl Mırazova.
Muǵalimder Ásııa Jandosqyzy Marattyń aldyn ala tapsyrylǵan testterdiń bárinde eń tómeni 123 ball, bes ret qatarynan 125 ball jınaǵanyn jáne onyń birinshi synyptan bastap tek qana bes degen baǵaǵa oqyp kele jatqanyn, óte tııanaqty da uqypty ekendigin aıtady.
Aınash ESALI,
«Egemen Qazaqstan».
ALMATY.
Sýrette: Ásııa Marat gımnazııa dırektory, Qazaqstannyń eńbek eri Aıagúl Mırazovamen birge.