Jyl jabylar tusta «Taraz lokomotıv jóndeý deposy» ujymynyń qyzmetkerleri aılyǵy shaılyǵyna jetpeıtinin aıtyp bas kóterdi. Jalpy sany 200-ge jeteǵabyl qyzmetker 70 myń teńgeden bastalatyn jalaqynyń jyrtyqty jamaýǵa da sep bola almaıtynyn alǵa tartyp otyr. Olardyń aıtýynsha, sońǵy birneshe jyl bederinde jalaqyǵa mardymdy soma qosylmaǵan.
«Aılyq kóterilsin!» degen uranmen attandaǵan qyzmetkerler jalaqynyń 20-30 paıyzǵa emes, 100 paıyzǵa óskenin qalaıdy. О́ıtkeni ınflıasııa men azyq-túlik baǵasynyń sharyqtaýy ábden qajytqan. Adamnan basqanyń bári qymbattaǵany shamyna tıgen jumysshylar jaqsy jumys isteý úshin jaqsy jalaqy talap etýden tanbaıtyndaryn aıtady. Áleýmettik teńsizdik ábden tentiretken qyzmetkerlerdiń aıtýynsha, alatyn syıaqy mólsheri 30 myń teńgege de jetpegen eken. Sońǵy úsh jylda jalaqy kóterý máselesin aıta-aıta qajyǵan olar sózimizdi eshkim tyńdamady dep kúıinip otyr. Amaldyń joqtyǵynan ereýildetken el másele ońynan sheshilse deıdi.
«Aqıqatyn aıtsaq, barar jer, basar taýymyz qalmaǵandaı kúı keship otyrmyz. Tyǵyryqqa tirelip bittik. Qolymyzǵa tıetin aılyq 110 myń men 140 myń teńgeniń shamasynda. Mundaı aılyqqa qalaı jan baǵýǵa bolady? Bizde bir ǵana talap bar. Jalaqymyzdy 100 paıyzǵa kótersin. Talabymyzdy túpkilikti oryndamasa, jumysty toqtatýǵa májbúr bolamyz. Jeter jerge jettik endigi», dedi «Taraz lokomotıv jóndeý» deposynyń jumysshysy Qaırat Esqaraev kúıinip.
Talap qoıǵandardyń arasynda jalaqymyz 70 myń teńge dep urandatqandar da bolǵan. Al Q.Esqaraevtyń aıtýynsha, 110 myńnan bastalatyn kórinedi. Dese de árkim óz jalaqysynyń mólsherin aıtyp otyrǵan sekildi. Alaıda qalaı alyp qarasaq ta, aýyr jumysqa jegilgen qyzmetkerlerdiń tabysy mardymsyz ekeni talas týdyrmasa kerek.
«Anyǵyn aıtsaq, shydamnyń da shegi bar ǵoı. Biz jalaqynyń kóterilgenin jyldyń basynan beri saryla kútip júrmiz. Olar 7-10 paıyz qosyldy degendi alǵa tartady. Biraq ózgergen túk joq. Bári báz baıaǵy qalpynda tur», deıdi «Taraz lokomotıv jóndeý» deposynyń jumysshysy Danııar О́mirbaev ashynyp.
Qyzmetkerlerdiń sóıleý mánerinen ábden ashynǵandary aıqyn ańǵarylady. О́n boılaryn emosııa jaýlap alǵandaı kórinedi. Basshylyqpen birge májilis zalyna barǵan jumysshylar jalaqynyń jyrynan bólek arnaıy beriletin kıim máselesi de taýsylmaı turǵanyn aıtyp, dabyl qaqty. Jumysshylardyń talabyna qulaq asty ma, álde áýelden solaı josparlanǵan ba, kim bilsin?! Áıteýir, depo dırektory eńbekaqy aldaǵy jyly kóteriletinin tilge tıek etti. Alaıda naqty qansha paıyz qosylatyny ázirge beımálim. О́ıtkeni bul máseleni aksıonerler aqyldasyp sheshetin kórinedi.
«Men negizi máseleniń mánisin qoldan kelgenshe túsindirip jatyrmyn. Munda 2-3 adam basqaryp, jaǵdaıdy ýshyqtyrmasa jarar edi. Aldaǵy kúnderi elordadan komıssııa keledi. Sol kezde jumysshylardyń barlyǵyn jınap, jaǵdaıdy qalypqa keltirip, bárin retteıtin bolamyz», deıdi «Qamqor lokomotıv» JShS fılıaly «Taraz lokomotıv jóndeý deposynyń» dırektory Ilııas Lesbaev daýryqqan daýǵa qashan naqty núkte qoıylýy múmkin ekenin tuspaldap.
Depodan shyqqan daý jergilikti atqarýshy bıliktiń de nazaryn aýdardy. Olar jumys tobyn qurýǵa nıetti. Jyl aıaǵynda qyzmetkerlerge on úshinshi jalaqy tólenetinin de aıtyp qaldy. On úshinshi jalaqy tólengeni jaqsy ǵoı. Alaıda qyzmetkerlerdiń jalaqysy qansha paıyzǵa ósedi? Aksıonerler qabyldaǵan sheshim olardyń kókeıine qona ma? Osy jaǵyna da den qoıǵan abzal.
«2022 jyldyń 13 jeltoqsanynda áleýmettik jelide «Qamqor lokomotıv» JShS Taraz lokomotıv jóndeý deposy qyzmetkerleriniń qatysýymen beınejazba jarııalandy. Jınalǵan jumysshylar syıaqy tóleý jáne jalaqyny 100 paıyzǵa kóterý talaptaryn alǵa tartqan.
Seriktestik basshysy I.N.Lesbaev, Taraz qalasy ákiminiń orynbasary Q.Ismaıl, qala prokýrorynyń orynbasary D.Asqar, kólik prokýratýrasynyń orynbasary N.Jýraev qyzmetkerlermen kezdesip, túsindirý jumystaryn júrgizdi.
Qazirgi tańda jaǵdaı turaqty. Qatysýshylar óz jumys oryndaryna tarady. «Qamqor lokomotıv» JShS Taraz lokomotıv jóndeý deposynyń jumysy qalypty deńgeıde jalǵasýda.
Atalǵan másele boıynsha jumys toby qurylyp, onyń quramyna «Qamqor lokomotıv» JShS bas dırektorynyń orynbasary A.Núsipqulov, kásipodaq jáne JShS-nyń basqa da qyzmetteriniń ókilderi endi.
JShS quryltaıshylary Táýelsizdik kúnine oraı JShS qyzmetkerlerine syıaqy (aılyq jalaqy mólsherinde) tólenetinin jetkizdi. Al jalaqyny kóterý máselesi jaqyn arada jumys tobynyń otyrysynda ujym músheleriniń qatysýymen talqylanady», delingen jergilikti atqarýshy bıliktiń resmı jaýabynda.
Qalaı bolǵan kúnde de jumysshylar jalaqynyń az ǵana mólsherde kóterilgenin qup kórmeıtin sekildi. Ony olardyń «Jalaqymyz 100 paıyzǵa kóterilsin» degen talaptarynan aıqyn ańǵardyq. Máseleni maıshammen qaraıtyn azamattar qyzmetkerlerdiń talabyn tolyq oryndaı ma? Álde mámilege kelýdiń basqa bir jolyn izdeı me?..
Aılyqtyń azdyǵyn aıtqan qyzmetkerlerdiń talaby oryndy sııaqty. О́ıtkeni depodaǵy 500-den astam jumysshy jylyna 600 elektrovozdy jóndep shyǵarady. Bilgen adamǵa bul ońaı jumys emes.
TARAZ