Elordada shańǵyroller tasjolynda 16 jeltoqsan kúni QR Táýelsizdiginiń 31 jyldyǵyna arnalǵan qysqy sport maýsymynyń ashylýy ótedi. Is-shara aıasynda shańǵy jarysy, gir tasyn kóterý, qol kúresi, arqan tartys jáne belbeý kúresi sekildi sport túrlerinen jarystar uıymdastyrylady, dep habarlaıdy Egemen.kz elorda ákimdiginiń resmı saıtyna silteme jasap.
Qalalyq sport basqarmasynyń baspasóz ortalyǵynyń málimetinshe, jarysqa jeke sporttyq jabdyqtary bar kez kelgen qala turǵyny qatysa alady. Tirkelý kezinde jeke kýálik bolýy qajet.
«Astanada qysqy sporttyq maýsym alǵashqy buqaralyq shańǵy jarysymen ashylady. Jyl saıyn qysqy sport túrlerinen maýsymnyń ashylýyna qalanyń myńdaǵan turǵyny men qonaqtary jınalady. Olardyń arasynda mektep oqýshylary, stýdentter, kúsh qurylymdarynyń qyzmetkerleri jáne qoǵam ókilderi sport jarystaryna qatysyp, kúsh synasady. Bul rette bastysy jeńiske jetý emes, óıtkeni jyl saıynǵy shańǵy festıvali otbasylyq jáne korporatıvtik demalystyń jaqsy bir túrine jatady. Sharaǵa qatysýshylardy tirkeý tańǵy saǵat 09:30-da, al shańǵy jarysy men sporttyq saıystar saǵat 11:00-de bastalady. Qatysýshylarǵa starttyq nómirler árbir jas tobyna qaraı jarys bastalmastan 30 mınýt buryn beriledi. Jyl saıyn dástúrli túrde ótetin sporttyq is-sharalar men shańǵy jarysynyń jeńimpazdary, júldegerleri ár jas toby boıynsha baǵaly syılyqtarmen, dıplomdarmen jáne medaldarmen marapattalady. Qala turǵyndary men qonaqtaryn qysqy shańǵy maýsymynyń ashylýyna oraı ótetin sporttyq merekege qatysýǵa shaqyramyz», deıdi qalalyq sport basqarmasynyń baspasóz hatshysy Madına Aıtqalıeva.
Astana qalasy ákimdiginiń qoldaýymen qalalyq Dene shynyqtyrý jáne sport basqarmasy uıymdastyratyn is-shara saǵat 11:00-de shańǵyroller tasjolynda bastalady.