Qysqy jylytý maýsymyna daıyndyq boıynsha ortalyq jáne jergilikti atqarýshy organdardyń qyzmetin tekserý jónindegi Komıssııa óz jumysyn aıaqtady, dep habarlaıdy Egemen.kz Prezıdenttiń baspasóz qyzmetine silteme jasap.
О́ńirlerde júrgizilgen kóshpeli tekserý qorytyndysy boıynsha jylý energııasyn berýdiń shektelýine, jylýdyń turaqty berilmeýine, rezervtik energııa kózderiniń jáne jóndeý materıaldarynyń apattyq qory bolmaýyna, energııa qural-jabdyqtarynyń ábden tozýyna, sondaı-aq óńirlerge kómirdiń ýaqtyly jetkizilmeýine qatysty derekter anyqtaldy. Jergilikti atqarýshy organdardyń esepterine qaramastan, birqatar nysan jylytý maýsymyna daıyn bolmaı shyqty.
Osyǵan baılanysty Úkimetke anyqtalǵan barlyq fakti boıynsha sharalar qabyldaý jáne jergilikti atqarýshy organdar qyzmetkerleriniń tártiptik jaýapkershiligin qarastyrý tapsyryldy.
Sonymen qatar elimizdegi 37 jylý elektr ortalyǵynyń tehnıkalyq jaǵdaıyna keshendi taldaý júrgizilip, olardyń qandaı táýekel top sanatyna jatatyny anyqtaldy. 19 JEO qaýiptiligi joǵary «qyzyl», 11 JEO «sary» jáne 7 JEO «jasyl» sanatqa kirdi.
Energetıkalyq keshenniń turaqty jumys isteýi úshin Úkimet pen ákimdikterge mynadaı sharalardy qabyldaý tapsyryldy.
Shuǵyl túrde:- túıtkildi jylý elektr ortalyqtary men jylý jelilerindegi jaǵdaıdy túzetý úshin shuǵyl sharalar josparyn ázirleý;- «qýat naryǵy» sheńberinde 2023 jyly JEO-lardy jóndeý naýqanyn júrgizýge qajetti 90 mıllıard teńgege jýyq qosymsha ınvestısııa tartýdy qamtamasyz etý;- jylý energetıkalyq kompanııalardyń óndiristik qyzmetkerleriniń eńbekaqysyn ortasha naryqtyq jalaqy deńgeıine deıin arttyrýdy qamtamasyz etý;- jylý jelilerine tehnıkalyq aýdıt júrgizý jáne elektr jelileri aktıvterine, sonyń ishinde olardy jekeshelendirýdiń zańdylyǵy men kommýnaldyq menshikke berýdiń tıimdiligin tekserý;- halyqtyń áleýmettik osal toptaryna kommýnaldyq qyzmetterge jumsalatyn shyǵyndardy sýbsıdııalaý túrinde ataýly kómek kórsetýdi qamtamasyz etý; - energetıkalyq kásiporyndardyń qyzmetin baqylaýdy kúsheıtý maqsatynda Atomdyq jáne energetıkalyq qadaǵalaý men baqylaý komıtetiniń aýmaqtyq departamentteriniń shtatyn kúsheıtý.
Júıeli túrde:- energetıkalyq nysandar qyzmetiniń táýekelderin basqarý isin baǵalaýdy jetildirip, obektige shyǵatyn naqty baqylaý ınstıtýtyn engizý arqyly qoldanystaǵy energetıkalyq baqylaý júıesin kúsheıtý;- Energetıka mınıstrligine jylýmen qamtý salasynda magıstraldi jáne taratýshy jylý jelilerin qadaǵalaý fýnksııasyn berý;- jylýmen jáne elektrmen qamtamasyz etý nysandarynyń jaı-kúıin shynaıy baǵalaý úshin táýelsiz tehnıkalyq aýdıt ınstıtýtyn engizý;- qoldanystaǵy zańnama talaptaryn buzǵany jáne qarjyny maqsatqa saı paıdalanbaǵany úshin Ákimshilik quqyqbuzýshylyq kodeksinde ákimshilik aıyppuldardy ósirý arqyly energetıkalyq keshen sýbektileri men olardyń birinshi basshylarynyń jaýapkershiligin kúsheıtý;- jylýmen jáne energııamen qamtamasyz etý sýbektilerine arnalǵan ózara mindettemelerdiń reglamenttelýin zańnama deńgeıinde qamtamasyz etý;- tarıf qarjysyn maqsatqa saı paıdalanbaýdyń jáne kapıtaldy syrtqa shyǵarýdyń aldyn alý úshin energetıkalyq kásiporyndar men tabıǵı monopolııa sýbektileriniń satyp alýlaryna memlekettik baqylaý ornatyp, prosedýralardyń ashyqtyǵyn qamtamasyz etý.
Komıssııa birqatar energetıkalyq kásiporynǵa qatysty qarjyny jylystatý, sondaı-aq qarajatty maqsatqa saı jáne tıimdi paıdalanbaý derekteri boıynsha jınaqtalǵan materıaldardy fıskaldyq jáne quqyq qorǵaý organdaryna tergeý júrgizip, prosessýaldyq sheshim qabyldaý úshin joldady.