Bul týraly Úkimet otyrysynda Indýstrııa jáne ınfraqurylymdyq damý mınıstri Qaıyrbek О́skenbaev aıtty. Vedomstvo basshysy qalalardaǵy tıisti jumystardy atqarý úshin qarjylandyrýdyń eki tetigi qarastyrylǵanyn jetkizdi, dep habarlaıdy Egemen.kz.
Qazaqstandaǵy 68 qalada káriz-tazartý júıelerin salyp, jańǵyrtý qajet. Bul baǵyttaǵy jumys qazir Saryaǵash, Atyraý jáne Fort-Shevchenko qalalarynda júzege asyrylyp keledi. Kelesi jyly Aqtaý, Lenger jáne Shymkentte taǵy 3 jobany iske asyrý kózdelip otyr.
«Memleket basshysynyń tapsyrmasyna sáıkes 2023-2028 jyldar aralyǵynda elimizde káriz tazartý júıesin salyp, jańǵyrtý josparlanǵan. Qazir respýblıkadaǵy 89 qalanyń 27-inde káriz-tazartý júıesi qarastyrylmaǵan. 41 qalada onyń tozý deńgeıi 60%-ǵa taıaý. Mınıstrlik osy baǵytta qarjylandyrýdyń eki tásilin pysyqtady. Birinshiden, memlekettik kepildikti usyna otyryp, halyqaralyq qarjy uıymdarynyń zaıymdaryn tartý arqyly. Atalǵan tásildi halqy 45 myńnan asatyn 26 iri qalada júzege asyrý kózdelgen. Ekinshiden, respýblıkalyq bıýdjetten bólinetin transfertter esebinen iske asyrý. Osy tásil halyq sany 45 myńnan aspaıtyn 36 shaǵyn qalada júzege asady», dedi Qaıyrbek О́skenbaev.
Mınıstr zaıymdyq qarajatty qaıtarýdyń eki kózi bar ekenin jetkizdi. Atap aıtqanda, tarıf pen respýblıkalyq jáne jergilikti bıýdjetten sýbsıdııalar bólý. «Alaıda respýblıkalyq bıýdjetten bólinetin sýbsıdııalardyń kólemi negizgi qaryzdyń jalpy somasynan aspaıtyn bolady», dedi IIDM basshysy.
Joǵaryda aıtylǵandaı, halyq sany 45 myńnan aspaıtyn 36 shaǵyn qaladaǵy káriz-tazartý júıesine baılanysty jobalar respýblıkalyq bıýdjetten bólinetin transfertter esebinen iske asyrylmaq.
Qalalardaǵy ekologııalyq ahýaldy eskere otyryp, káriz-tazartý júıelerin jańǵyrtýdyń iske asyrý kezeńderi men qarjylandyrý kózderine baılanysty atalǵan jobalardyń tizbesi qalyptastyryldy. Qarjylandyrý máselesi boıynsha, ásirese, Eýropa qaıta qurý jáne Damý banki men Azııa Damý bankimen belsendi jumys júrgizilip jatyr.
«Mınıstrlik KTJ jobalaryn ýaqytyly iske asyrý jónindegi barlyq qajetti sharany qabyldady. Atap aıtsaq, káriz-tazartý júıeleri jobalaryn iske asyrýdyń joldary Turǵyn úı-kommýnaldyq ınfraqurylymdy damytýdyń 2026 jylǵa deıingi tujyrymdamasynda qarastyrylyp, Ulttyq ekonomıka jáne Qarjy mınıstrlikterimen birlesip, «Memlekettik kepildikti kózdeıtin sý arnalaryn salýǵa halyqaralyq qarjy uıymdarynyń zaıymy» tetigi boıynsha Jol kartasy bekitildi. Sondaı-aq káriz-tazartý júıelerin salyp, jańǵyrtý boıynsha jobalardy irikteıtin ádisteme aıqyndaldy», dedi Indýstrııa jáne ınfraqurylymdyq damý mınıstri.