Astananyń 16 jastaǵy jasóspirim turǵyny Kókshetaý mańyndaǵy taý shańǵysy kýrortynda shańǵy teýip júrip qaıtys boldy, dep habarlaıdy Egemen.kz.
Aqmola oblysy boıynsha polısııa departamentiniń málimetinshe, 2 qańtarda saǵat 17:25-te Zerendi aýdandyq polısııa bólimshesine shańǵy bazasynyń meńgerýshisinen oqys jaǵdaı týraly habarlama kelip túsken. Anyqtalǵandaı, elordanyń kámeletke tolmaǵan turǵyny (2006 jyly týǵan) Sadovoe aýylynan 10 shaqyrym jerde shańǵy tebýge arnalǵan aımaqta qaıtys boldy.
«Oqıǵa ornyna dereý jedel-tergeý toby keldi. Kámeletke tolmaǵannyń shańǵy bazasyna ata-anasymen demalýǵa kelgeni anyqtaldy. Jas jigittiń denesin eki demalýshy taýyp alǵan. Jigit shańǵy jolyna túsý kezinde aǵashqa soǵylyp, qulap, esin jımaı, sol jerde qaıtys boldy», dep habarlady Aqmola oblysy ákimdiginiń baspasóz qyzmetinen.
Jigit jedel járdem kelgenshe qaıtys boldy.
Atalǵan fakti boıynsha Qazaqstan Respýblıkasy Qylmystyq kodeksiniń 306-baby «Qaýipsizdik talaptaryna saı kelmeıtin jumystardy oryndaý nemese qyzmetter kórsetý» boıynsha sotqa deıingi tergeý bastaldy. Tıisti saraptamalar taǵaıyndaldy.