Astana Hub halyqaralyq IT-startaptar tehnoparkiniń Startup Orda óńirlik IT-kásipkerlerdi damytý baǵdarlamasy óz máresine jetti. Baǵdarlamany qorytyndylaý maqsatynda Demo Day jobalar baıqaýy uıymdastyrylyp, jalpy júlde qory 5 mln teńge kóleminde aqshalaı grant berildi.
Eki aıǵa sozylǵan startap-ınkýbator Qazaqstannyń 10 qalasynda – Aqtóbe, Aqtaý, Qostanaı, Oral, Pavlodar, Taraz, Qyzylorda, Petropavl, Taldyqorǵan, Semeıde ótti.
Startup Orda-ǵa qatysý úshin el boıynsha barlyǵy 7 myńnan astam ótinim tústi. Oqý baǵdarlamasy kezeńinde 285 is-shara uıymdastyrylyp, oǵan óńirler boıynsha IT salasyn damytýǵa múddeli 10 myńǵa jýyq adam qatysty.
Baǵdarlamany qorytyndylaǵan Demo Day aıasynda qalalarda jobalar jármeńkesi ótip, qatysýshy komandalar qazylar alqasy aldynda qysqasha «pıtch» formatynda óz ıdeıalaryn tanystyrǵan bolatyn. Jobanyń sońǵy máresine 200 komanda shyǵyp, óz IT-ıdeıalaryn usyndy. Sonyń ishinde qazaqstandyq naryq kontekstindegi ıdeıanyń jańalyǵyn, bolashaqta jobanyń nátıjeliligin, ıdeıanyń ımpaktisin, ıaǵnı ónimniń problemaǵa oń áserin, ónimniń aýqymdylyǵyn, ári ınnovasııalylyǵyn usynǵan 100 joba úzdik atandy. Aqshalaı syılyqpen qatar jeńimpazdar elordalyq tehnoparktiń bilim berý baǵdarlamalaryna qol jetkizip, startaptar men ınnovasııalar salasynda óz damýyn jalǵastyrýǵa múmkindik aldy.
Eń myqtylaryn anyqtaý úshin quzyretti komıssııanyń quramyna jergilikti atqarýshy bılik organdarynyń ókilderi, kásipkerler, sondaı-aq Astana Hub sarapshylary shaqyryldy.
Jobalar arasynda Aqtaýdan QarapaiymEmdeu startapyn atap ótýge bolady. Onyń tolyq gýmanoıdty robot-terapevti SenimPlus – terapevt aǵynyn jeńildetý jáne naýqastardy anyqtaý maqsatynda jasalǵan jasandy ıntellekt pen mehanıkanyń jıyntyǵy. Temperatýra, ımpýls, qannyń ottegimen qanyqtylyǵy, kózdiń sharshaýyn taldaý arqyly, sondaı-aq pasıenttiń aýyzsha kórsetkishteri arqyly robot boljamdy dıagnozdy, emdeýdi jáne keıinnen medısınalyq anyqtamalardy anyqtaı otyryp, dıagnostıka men taldaý jasaı alatyny da bar.
Qaýipsizdik taqyrybyn tarazdyq startap – Qauipsiz qozǵaǵan bolatyn. Bul – uıaly telefonǵa sıgnal beretin joǵary jıilikti antennany paıdalana otyryp, gaz býy nemese órt kezinde qońyraýmen dereý eskertetin shaǵyn sensor-qurylǵy. Sondaı-aq startap quryltaıshylary jumys barysynda tótenshe jaǵdaılar mınıstrligi, tótenshe jaǵdaılar departamenti uıymdaryn, memlekettik nysandardy, qonaqúılerdi, qurylys kompanııalary men turǵyn úılerdi negizgi tapsyrys berýshiler retinde kóretini sózsiz.
Taldyqorǵandyq belsendiler See The Future jobasymen kózi nashar kóretin jandarǵa kómek kórsete bastady. Jas jigitterdiń daıyn ónimi ekojúıelik qurylǵy, ıaǵnı neırondyq jeli, Lidar (Real Sense) sensory bar kamera jáne qulaqqaptar men mobıldi qosymshadan turady. Qurylǵyny paıdalanýshy belgisiz ortada sharlaý múmkindigine ıe bolyp, bul ózara kúndelikti shekteýge toly ómirde qolaısyzdyqty joıatyny sózsiz.
Qyzyqty startaptar tizimin Jolga mobıldi qosymshasy jalǵastyrady. Bul ınnovsııalyq sheshim AR tehnologııasyna, 360 gradýstyq fotosýretterge, sonymen qatar Qazaqstannyń týrıstik aımaqtaryn ońaı zertteýge arnalǵan tabıǵı oryndar týraly tolyq aqparatty bere alatyn 3D kartalaryna negizdelgen. Sonymen qatar aqparat jetkiliksiz bolyp kórinse, jergilikti gıdpen ońaı baılanysyp, belgili bir lokasııanyń ornalasqan jeri týraly egjeı-tegjeıli málimetterdi bilýge múmkindik bar. Aımaqtyń tolyq beınesin qalyptastyra otyryp, mobıldi qosymsha barýdy josparlap otyrǵan jerdiń sıpaty men jaǵdaıyn sezdiredi. Bul joba Qazaqstandaǵy týrızmdi damytýǵa jáne ilgeriletýge baǵyttalǵan.
«Birneshe jyldan keıin kóptegen qyzmet salalary, sondaı-aq týrızm IT tehnologııasyz ómir súre almaıdy. Biz paıdalanýǵa ońaı mobıldi qosymshany usynamyz, sondaı-aq onlaın tájirıbeni barlyǵyna qoljetimdi etemiz», dedi Jolga mobıldi qosymshasyn usynǵan pavlodarlyq Asylhan Sársenbaev pen Ahmetjan Qaýmuhamed.
Jalpy, eki aılyq oqytý barysynda baǵdarlamaǵa qatysýshylar bıznes-ıdeıany qalyptastyrý, naryqty taldaý, maqsatty aýdıtorııany zertteý, bıznes-model qurý jáne ıdeıany monetızasııalaý tásilin tańdaý boıynsha qajetti bilim men daǵdylarǵa ıe boldy. Sondaı-aq óz jobalarynyń tusaýkeserleri men pıtchıngterin daıyndap, marketıng, zııatkerlik menshikti qorǵaý jáne startaptardy memlekettik qoldaý sharalary boıynsha qosymsha keńester de túıgen bolatyn.
Joǵaryda aıtylǵan óńirlerde baǵdarlamaǵa qatysýǵa tirkelý tegin ekeni, ári nátıjesinde IT salasynda startap-jobasyn bastaǵan barlyq múddeli tulǵa ınvestorlarǵa ıdeıalaryn nemese daıyn ónimin usyna alatyny aldyn-ala aıtylǵan bolatyn.
Eske sala keteıik, Startup Orda – jahandyq trendter negizinde qurylyp, álemdegi IT-tehnologııalardy damytýdyń mańyzdylyǵyn eskere otyryp uıymdastyrylǵan baǵdarlama.