Ústel tennısinen bıylǵy jylǵy álem chempıonatynyń jalaýy mamyr aıynyń ekinshi jartysynda Ońtústik Afrıka Respýblıkasynyń (OAR) Durban qalasynda jelbireıtini belgili.
Al sol jarystyń irikteý týrnıri bul kúnderi Qatardyń bas shahary – Dohada ótýde. Bul jerde sary qurlyqtyń eń úzdik tennısshileri ózara sheberlik baıqasýda. Kúni keshe ǵana Parsy shyǵanaǵynan qýanyshty habar jetti. Juptyq básekede Kırıll Gerasımenko men Alan Qurmanǵalıev sheshýshi tusta ırandyq Nıma Alamııan men Noshad Alamııandy 4:0 esebimen oısyrata utyp, álemdik dodanyń joldamasyna ıelik etti. Aralas juptar saıysynda Aıdos Kenjeǵulov pen Záýresh Aqashevanyń da asyǵy alshysynan tústi. Olar Úndistannyń ókilderi – Sharat Achanta men Srea Akýladan 4:3 esebimen aılasyn asyrdy.
Jekelegen básekede toǵyz jerlesimiz óner kórsetip, solardyń arasynan tek Kırıll Gerasımenkonyń joly boldy. Ol Saýd Arabııasynyń sportshysy Halıd ál-Sharıfti bas kótertpeı utty.