Elorda meshitteriniń mesenattary astanalyqtarǵa tegin taksı men ystyq as uıymdastyrdy. Naýqanǵa «Kóktal» meshitiniń bastaýymen qalanyń barlyq meshiti atsalysty, dep habarlaıdy Egemen.kz elorda ákimdiginiń resmı saıtyna silteme jasap.
Naýqan aıazdy kúnderi turǵyndardy qala boıynsha tegin tasymaldaıtyn 20 júrgizýshiniń jumysynan bastaldy. Júrgizýshi retinde meshitterdiń ımamdary men shákirtteri qatysty.
«Mundaı aksııalardy birneshe jyldan beri ótkizip kelemiz. Astananyń aıazdy kúnderinde azamattarymyzǵa qol ushyn sozǵymyz keledi. Basqa júrgizýshilerdi de aksııaǵa qosylýǵa jáne turǵyndarǵa kómektesýge shaqyramyz», dedi «Áziret Sultan» meshitiniń bas ımamy Erbolat Júsipov.
Eriktiler jol jumysshylaryna ystyq shaı men palaý taratty. Kommýnaldyq uıymdardyń 200-ge jýyq qyzmetkeri qamtyldy. Jumysshylardyń barlyǵy qala boıysha qar kúrep júrgen adamdar.
Sonymen qatar jylytý maýsymynyń sońyna deıin demeýshilik kómek arqyly meshit birqatar otbasyǵa kómir satyp alýǵa jáne azyq-túlik sebetterimen qamtamasyz etýge kómektesedi. Turǵyndardy tegin tasymaldaý naýqany aıazdy kúnderdiń sońyna deıin jalǵasady. Tegin taksılerdi avtomobıl korpýsyndaǵy japsyrma arqyly ajyratýǵa bolady.
Esterińizge sala keteıik, bul kúnderi Astanada sarshunaq aıaz ornap tur, termometr baǵany -30 gradýstan tómen kórsetip tur. Qalanyń kommýnaldy qyzmetteri kúndiz-túni toqtaýsyz jumys istep jatyr. Elorda turǵyndary men qonaqtary mundaı jaǵdaıda abaı bolýy, kóktaıǵaq kezinde qozǵalys erejelerin qatań saqtaýy jáne jaraqat pen úsiktiń aldyn alý úshin kóshede uzaq ýaqyt bolmaýy qajet.