Kúrshim baǵytyndaǵy Buqtyrma sý qoımasynan kólikter jazdygúni parommen qatynasa, qysta kók muzdyń ústimen zýlaıdy. Muzdyń aty – muz. Aıtty, aıtpady, keıbir kúnderi shytynap turady. Kúni keshe muz ústinde taǵy bir oqys oqıǵa oryn aldy.
Taǵy bir dep otyrǵanymyz, osydan bir aı buryn muz oıylyp ketip, avtokólik sý astyna ketken. Ondaǵy oqıǵada áıel adam kóz jumyp, týǵan-týystarynyń qabyrǵasy qaıysqan. Bul joly muz ústin kúrep bara jatqan traktor bar-joǵy bes-alty sekýnd ishinde kózden ǵaıyp boldy. Muz opyrylyp, sý astyna ketti. Qudaı saqtady. Júrgizýshisi shıraq eken. Shyǵyp úlgerdi. Onyń bárin áleýmettik jelide taraǵan beınetaspadan kórip, tań boldyq. Buǵan deıin de qanshama kólik, qanshama adam muz astyna ketti?! Kópir qurylysy aıaqtalmaıynsha, bul oqıǵanyń qaıtalana bermesine taǵy kepildik joq.
Áıteýir, bul joly oqys oqıǵadan soń muz ústimen júrýge ýaqytsha tyıym salynyp, tártip saqshylary kúzetke turǵan. Olar da qashanǵy kúzetedi?! Túısigi bar júrgizýshi tyıym salynsa, muz ústine ózdiginen de shyqpaýy kerek.
Shyǵysta qalyń qar tústi. Artynsha jańbyr sebeledi. Aýa temperatýrasy +1 gradýsqa deıin jylydy. Mundaı aınymaly kún raıynda fızıka zańdylyǵy boıynsha, muzdyń da tyǵyzdyǵy ózgermeı me?! Sóıtip, shytynap turǵan muz ústine traktor dóńgelegi túskende, jaryldy da ketti. Bul – jolaýshylardyń paıymy. Shyntýaıtyna kelgende, 1,5 tonnaǵa ǵana ruqsat etilgen muz ústinen 9-10 tonnalyq «KamAZ» júk kóligi ótip, júrgizýshi óziniń ǵana emes, basqa da jolaýshylardyń ómirine qaýip tóndirip ketken eken.
– Muz – sý betine jaıylǵan qaǵaz sııaqty. Salmaq tússe, qozǵalysta bolady. Aýyr júk kóligi ótip ketken soń qalyńdyǵy 30-35 sm muzdy búldirgen. Ádette, tehnıka muzǵa birden batyp ketpeıdi. Birinshi dóńgelegi túsedi. Salmaq túsken soń ǵana birtindep batady. Al beınejazbada kórgenimizdeı, traktor 4-5 sekýnd ishinde batyp ketti. Endi muz qatqan soń altybaqan quryp, tehnıkany shyǵaryp alamyz, – dedi «OblShyǵysJol» JShS basshysy Nurjan Jumadilov.
Oblystyq Polısııa departamentiniń baspasóz qyzmeti atalǵan oqıǵa týraly eshkim habarlaspaǵanyn aıtty. Dese de tekserý jumystaryn bastaǵan. Al oblys turǵyndary «Qyzyl tý» ótkelindegi kópir qurylysyn tezdetpese, mundaı oqys jaǵdaılar azaımaıtyndyǵyn aıtyp júr.
Aıta keteıik, «OblShyǵysJol» JShS-nyń bas mamany L.Nuqybaevanyń habarlaýynsha, «Qyzyl tý» ótkelindegi muz jolymen júrýge tyıym salyndy. Aýa raıy kúrt jylyp, muz betinde jaryqtar paıda bolǵan. Onyń ústine, ótkel betine erigen qar sýy jaıylǵan. Jolaýshylar qaýipsizdiginiń aldyn alý maqsatynda «Qyzyl tý» ótkelindegi muz arqyly jol barlyq kólik túrleri úshin jabyldy. Jolaýshylar endi Úlken Naryn, Altaı arqyly ǵana Kúrshim, Marqakólge qatynaı alady.
Shyǵys Qazaqstan oblysy