Qara altynnyń qut qambasy sanalatyn Atyraý topyraǵynyń dańqty perzenti, ardager munaıshy Embi kenishteriniń ashylýyna atsalysqan belgili geolog, Memlekettik syılyǵynyń laýreaty Orynǵazy Esqazıev baqıǵa ozdy degen qaraly habardy estip, dáýir kóshkendeı kúıde otyrmyn.
Aıaýly Orekeń 1957 jyly S.M.Kırov atyndaǵy Qazaq memlekettik (qazirgi Ál-Farabı atyndaǵy Qazaq ulttyq) ýnıversıtetin geologııa mamandyǵy boıynsha támamdap, eńbek jolyn Atyraý óńirindegi «Embimunaı» birlestigine qarasty «Qoshqar» munaı ónerkásibi basqarmasynda munaı óndirý jónindegi operator qyzmetinen bastap, ataýly birlestikte qyryq jyl eńbek etti. Atyraý aımaǵynyń jazdaǵy bet kúıdiretin ańyzaq-ystyq jeli men qystaǵy borandy aıazyna, tabıǵattyń kez kelgen qatal minezine qarsy turyp, ken ornyn kezip júrip, jer astyndaǵy baılyqty barlaý ońaı sharýa emes. Eńbek adamyn bolattaı shyńdaıtyn aýyr kásiptiń qyr-syryn meńgerip, týǵan eliniń kórkeıip, damýyna úles qosqan baılyqtyń kózin ashý Orynǵazy Esqazıevtiń ómirlik isine aınaldy.
Jas maman Qoshqar munaı óndirý kásipshiliginde munaı óndirý jáne qabat qysymyn saqtaý operatory qyzmetinen bastap, uńǵymalardy zertteý brıgadasynyń sheberi, Qoshqar ken alańynyń geologi, Komsomol munaı óndirý kásipshiliginiń aǵa geologi, «Prorvamunaı» munaı-gaz óndirý basqarmasy bas geologi bolyp eńbek etti.
Qazaq munaıynyń ardaqtylaryna arnalǵan eńbekte áriptesteriniń arasynda asa qurmetke ıe bolǵan geolog Orynǵazy Esqazıevtiń kásibı biliktiligin kelesideı sıpattaıdy: «О́ziniń ujymdas joldastarymen birge qoıan-qoltyq eńbek barysynda olarǵa ǵylymı túsinik berý, aqyl-keńes aıtý arqyly Orynǵazy alǵa qoıǵan maqsatqa jetý jolynda jan aıamaı ter tókti, mamandyǵyn ózdiginen jetildirip, sheteldik tájirıbeni úırendi, ózine basshylyq etken tisqaqty mamandardyń aıtqan pikir-usynystaryn eskerýsiz qaldyrmady, sanasyna toqydy».
Munaı kenishterinde jıyrma jylǵa jýyq qyzmet etip, geologııa men barlaý isiniń qyr-syryn qazba ornynda júrip meńgerip, bilim men tájirıbede qatar shyńdalǵan bilikti mamanǵa qaladaǵy «Embimunaı» birlestiginiń geologııa bólimin basqarý senip tapsyryldy. Orynǵazy Esqazıev óz sózinde bul qyzmette negizgi jumysy – munaı qoryn kóbeıtý bolǵanyn aıtady. «Endigi jerde atalǵan birlestiktiń búkil geologııalyq jumystaryn basqarý, Munaı mınıstrligi men eki ortadaǵy kúlli qatynas qaǵazdaryn azý, kúnbe-kún telefon arqyly óndiristegi árbir barlaý uńǵylarynyń jaǵdaıyn habarlaý, basqa da qosalqy jumystardy retteý – osynyń bári meniń moınymda. Geologııa bóliminiń negizgi kópshilik jumysy – geologııalyq barlaý, geofızıkalyq zertteý, osylaısha birlestiktiń bolashaǵyn keńeıtip, jyldan jylǵa munaı qoryn kóbeıtý», – dedi O. Esqazıev.
Atalǵan qyzmette júrip, áriptesterimen birge elimizdegi alyp keshenderdiń biri «Teńiz» túbinde mol munaı qory baryn anyqtap, eńbek jolyndaǵy eleýli jetistikterdiń birine qol jetkizdi. Qajyrly eńbegi men uzaq jyldar boıy jınaǵan bilimi men biliktiliginiń arqasynda Qazaqstan Respýblıkasy Memlekettik syılyǵynyń laýreaty atanyp, arnaıy tós belgimen marapattaldy. Jer qoınaýynyń Qurmetti barlaýshysy Orynǵazy Esqazıev respýblıka deńgeıinde ǵana emes, Keńes Odaǵyna belgili maıtalman munaıshylar qatarynda boldy.
Munaıly meken Atyraý óńirinde mamandyq tańdarda ata kásipti jalǵap, munaı salasynda urpaq sabaqtastyǵy qaǵıdattaryn ustanǵan munaıshy dınastııalary barshylyq. Esqazıevter áýleti de bul dástúrden alshaqtamady. «Áke kórgen – oq jonar...» degen halyq danalyǵymen Orynǵazy aqsaqaldyń uly Qurmanǵazy Esqazıev te munaı salasyna etene aralasyp, elimizdegi jetekshi «QazMunaıGaz» ulttyq kompanııasynyń basqarma tóraǵasynyń barlaý jáne óndirý jónindegi orynbasary retinde jaýapty mindetti atqaryp keledi.
Orynǵazy Esqazıev – sanaly ǵumyryn el ıgiligi jolynda qyzmet etýge arnap, otandyq munaı-gaz salasynyń qalyptasyp, odan ári damýyna zor úles qosqan tulǵa. Abyroıy asqaq munaıshy Orynǵazy Esqazıevtiń ǵıbratty ǵumyry, tabysty eńbek joly – urpaqtary men jas munaıshylarǵa úlgi bolyp qala bermek.
Mahambet BATYRBAEV,
munaı-gaz salasynyń ardageri, Memlekettik syılyqtyń laýreaty