Epılepsııa aýrýy týraly estimegen adam joq shyǵar. Aýrýdyń bul túrine operasııa jasaý ońaı emes. Bul rette otandyq medısına salasynyń damýy úshin ozyq eldermen tájirıbe almasýdyń paıdasy zor. Jaqynda Almatyda álemge áıgili Sharıte klınıkasynyń neırohırýrgi, professor Ýlrıh Tomale epılepsııanyń kúrdeli túri bar bes balaǵa operasııa jasady.
Almatynyń № 2 qalalyq balalar klınıkalyq aýrýhanasynda úsh kún boıy Germanııadan kelgen professordyń qatysýymen «Epılepsııanyń farmakorezıstentti túri bar balalardaǵy az ınvazıvti fýnksıonaldyq gemısferotomııa» balalar neırohırýrgııasy boıynsha biregeı sheberlik sabaǵy ótti.
Farmakorezıstentti epılepsııa kezinde durys tańdalǵan epılepsııaǵa qarsy preparattar tıimsiz jáne epılepsııalyq ustamalardy baqylaýdy qamtamasyz ete almaıdy. Álemdik statıstıkaǵa sáıkes epılepsııany dári-dármekpen emdeý naýqastardyń 70-80 paıyzyna tıimdi. Qalǵan 20-30 paıyzynda epılepsııanyń farmakorezıstetti túri bar. Eger basqa emdeý ustamalardy baqylaýǵa kómektespese, epılepsııany hırýrgııalyq emdeý taǵaıyndalady. Keıingi jyldary epılepsııa hırýrgııasy boıynsha jańa tehnologııalar ázirlendi. Olar buryn mundaı emdeý múmkin bolmaǵan pasıentterdiń saýyǵyp ketýine múmkindik beredi deıdi mamandar.
«Bizdiń bes kishkentaı balamyzǵa operasııa jasaldy. Berlındegi «Sharıte» klınıkasynan kelgen qonaq, professor Tomaleniń jetekshiligimen ótkizilgen sheberlik sabaǵynyń barysynda ustamalary jıi bolatyn epılepsııamen aýyratyn balalardyń mıyna aýyr, kúrdeli ota sátti júrgizildi. Balalar – qazir neırohırýrgııa bóliminde. Bolashaqta mundaı balalarǵa biz óz betimizshe ota jasaımyz dep oılaımyn», dep atap ótti №2 qalalyq balalar klınıkalyq aýrýhanasynyń bas dárigeri, belgili qazaqstandyq neırohırýrg Marat Rabandııarov.
Iá, mundaı tájirıbe almasýdyń bir paıdasy – bolashaqta epılepsııamen aýyratyn balalardyń ata-analary emdelýge sheteldik klınıkalarǵa barý, kóp qarajat jumsaý, shetelde ózin qolaısyz seziný sekildi áýreshilikten qutylady.
Elimizde 18 jasqa deıingi balalar MÁMS júıesinde memleket tarapynan saqtandyrylǵan. Sondaı-aq №2 qalalyq balalar klınıkalyq aýrýhanasynyń praktıkasyna engizilgen epılepsııa hırýrgııasy boıynsha operasııalar pasıentterdi iriktegennen keıin mindetti áleýmettik medısınalyq saqtandyrý aıasynda tegin júrgiziledi.
Aıta keteıik, professor Ýlrıh-Vılgelm Tomale – balalar epılepsııasyn hırýrgııalyq emdeý salasyndaǵy álemge belgili maman. Praktıkalyq balalar neırohırýrgi jolynyń barlyq kezeńinen ótken Tomale 8 jyldan asa ýaqyt boıy Sharıte ýnıversıtettik klınıkasynyń pedıatrııalyq neırohırýrgııalyq qyzmetin basqardy.