О́ńiraralyq yntymaqtastyq áleýeti

Keshe Ortalyq kommýnıkasııalar qyzmetinde Mańǵystaý oblysy ákiminiń orynbasary Sholpan Ilmuhanbetova brıfıng ótkizdi. Onda negizinen eýra­zııalyq ıntegrasııa aıasyndaǵy óńir­ara­lyq yntymaqtastyqtyń nátıjeleri sóz boldy. Aldymen ol óńirdiń syrtqy saýda aınalymynan qysqasha ha­bar­dar etti. Onyń aıtýynsha, ótken jyly oblystyń syrt­qy saýdadaǵy taýar aınalymy 10 mıllıard dollardy qura­ǵan. Bul 2012 jylǵymen salys­tyrǵanda 15 paıyzdan astamǵa kóp. Munyń 9 mıllıard dollary eksportqa shyǵarylǵan taýar­lardyń úlesine tıedi. «Keden odaǵynyń jumys isteı bastaýy óńirdiń ekonomıkalyq kórsetkishine jańasha serpin beretini baıqalyp otyr, – dedi Sholpan Ilmuhanbetova. – О́tken jyldyń ózinde ǵana Mańǵystaý oblysynyń Reseı men Belarýs elderi arasyndaǵy taýar aınalymy 113 paıyzdy qurap, 217 mıllıon dollarǵa jetti. Onyń ishinde Reseımen 14 paıyzǵa, Belarýspen 6 paıyzǵa artty». Sholpan Ilmuhanbetova ob­lystyń Reseı men Belarýs ká­sip­oryndary arasyndaǵy baı­lanystarǵa da toqtaldy. Ákim oryn­basarynyń atap ótýinshe, oblys­tyń kásiporyndary reseı­lik jáne belarýstik kompanııalarmen birlesken jaǵdaıda túrli taýarlar óndirýdi, júk tasymaldaýdy jolǵa qoıǵan. Búginde oblysta jáne atalǵan elder aýmaqtarynda 300-ge jýyq birlesken kásiporyn jumys istep keledi. «Birlesken kásiporyndardyń oıdaǵydaı jumys isteýi jergilikti bıýdjetke túsetin qarjy kólemin arttyra túsýde, – dedi oblys ákiminiń oryn­basary. – Mysaly, ótken jy­ly birlesken kásiporyndardan bıýd­jetke túsken qarajat 13 paıyzǵa artty». Mańǵystaý oblysynda azyq-túlik túrleriniń baǵasy res­pýb­lıka boıynsha eń joǵary eke­nin statıstıkalyq málimetter kórsetedi. Aldaǵy jyldary bul másele sheshimin tabatyn sekildi. «Eýrazııalyq ekonomıkalyq odaq sheńberinde birqatar birlesken jobalardy júzege asyrý kóz­delip otyr, – dedi Sholpan Il­mu­hanbetova osy jóninde. – Oblysqa azyq-túliktiń 85 paıyzǵa jýyǵy ózge aımaqtardan ákelinedi. My­saly, sút pen kókónis túrleriniń bar­lyǵy derlik Reseı men Bela­rýsten jetkiziledi deýge bolady. Osyny sál de bolsa azaıtý maqsatynda budan eki jyldaı buryn Belarýske baryp, olar­dyń agroqalashyqtary tájirı­be­lerimen tanysqan edik. Endi belorýstermen birlesip, agroqalashyq salýdy josparlap otyrmyz». Sholpan Ilmuhanbetova, son­daı-aq, Eýrazııalyq ekonomıkalyq odaq jumys isteı bastaǵan soń, oblysqa eńbek resýrstarynyń aǵylatyny jóninde de óz oıyn bildirdi. «Qazirgi kezde bizdiń oblysta Reseı men Belarýstiń bir myńǵa jýyq azamaty jumys kúshi retinde tirkelgen, – dedi ol. – О́ńirde birqatar iri jobalardy júzege asyrý kózdelip otyr. Sol jobalar iske qosylǵan soń, taǵy bir myńǵa tarta maman keledi dep josparlanýda. Olar biliktiligi joǵary mamandar bolýy tıis. О́ıtkeni, óte sırek jáne zamanaýı tehnologııalardy ıgerýge bilikti, tájirıbeli mamandar qajet. Bul mamandar munaı-gaz sektory men mashına jasaý salasyna tartylady». Álısultan QULANBAI, «Egemen Qazaqstan».