Shetel ınvestorlary keńesiniń otyrysy aıasynda Memleket basshysy Nursultan Nazarbaev Italııa Respýblıkasynyń Premer-mınıstri Matteo Rensımen kezdesti. Kezdesý barysynda Qazaqstan men Italııa yntymaqtastyǵynyń saýda-ekonomıkalyq jáne ınvestısııalyq salalardy qamtyǵan basymdyǵy bar baǵyttary talqylandy.
Nursultan Nazarbaev M.Rensıdi Italııanyń Premer-mınıstri laýazymyna taǵaıyndalýymen quttyqtady jáne ekijaqty qatynastardyń qarqyndy damyp kele jatqanyn atap ótti.
– Qazaqstan sizdiń elmen jaqsy qarym-qatynasqa múddeli. Italııa – bizdiń iri saýda jáne ınvestısııalyq seriktesimiz, biz ózara yqpaldastyǵymyzǵa jańa serpin bere alamyz. Men sizdi bizdiń elge resmı saparmen de kelýge shaqyramyn, – dedi Qazaqstan Prezıdenti.
Italııa Premer-mınıstri óz kezeginde Nursultan Nazarbaevqa osy kezdesý úshin alǵysyn bildirip, Qazaqstanǵa resmı saparmen kelý týraly shaqyrtýdy zor rızashylyqpen qabyl alatynyn aıtty.
Sonymen qatar, kelissózder barysynda munaı-gaz, kólik, energetıka jáne aýyl sharýashylyǵy sekildi salalardaǵy qarym-qatynastardy damytý perspektıvalary qarastyryldy. Sondaı-aq, 2014 jyldyń ekinshi jartysynda Italııa tóraǵalyq etetin Eýropalyq odaqpen Qazaqstannyń ózara is-qımyl taqyryby da qozǵaldy.
Budan bólek, N.Nazarbaev pen M.Rensı halyqaralyq kún tártibindegi meılinshe ózekti máseleler jóninde pikir almasty.
Kelissózderdiń qorytyndysy boıynsha Qazaqstan Prezıdenti men Italııa Premer-mınıstriniń qatysýymen kelesi qujattarǵa qol qoıyldy:
– «QazMunaıGaz» UK» AQ pen «ENI S.p.A.» kompanııasy arasynda Isataı geologııalyq barlaý jobasyn jáne keme jasaý/keme jóndeý zaýytynyń qurylysy jobasyn júzege asyrý týraly kelisim;
– Qazaqstan Respýblıkasynyń Indýstrııa jáne jańa tehnologııalar mınıstrligimen «Iveko S.p.A.» jáne «Allıýr Grýpp» JShS arasyndaǵy О́zara túsinistik týraly memorandým.
Qol qoıý rásiminen keıin Nursultan Nazarbaev pen Matteo Rensı birlesken málimdeme jasady.
Memleket basshysy Qazaqstannyń Italııamen qarym-qatynastary kóptegen baǵyttar boıynsha qarqyndy damyp kele jatqanyn aıtty.
– Italııa – Qazaqstannyń Eýropadaǵy strategııalyq jáne ekonomıkalyq seriktesi. Qol jetken kelisimder eki eldiń arasyndaǵy seriktestikti joǵary deńgeıge kóteretin bolady. Qazaqstan men Italııa arasyndaǵy saýda-sattyq 14 mıllıard dollardan asady. Qazaqstandyq jalpy syrtqy taýar aınalymynyń 13 paıyzy osy eldiń úlesine tıedi. Italııalyq ınvestısııalardyń bizdiń ekonomıkadaǵy jalpy kólemi 6,5 mıllıard dollardy quraıdy. Sonymen qatar, Italııa qazaqstandyq munaıdyń iri tutynýshysy da bolyp tabylady. Qazaqstan ótkizetin EKSPO kórmesine de Italııa belsene qatysady dep oılaımyz. Halyqaralyq deńgeıdegi birqatar máselelerde eki eldiń ustanymdary uqsas. Osyndaı yntymaqtastyq aldaǵy ýaqytta da jalǵasa beredi dep senemin. Sebebi, Italııa men Qazaqstan arasyndaǵy yntymaqtastyq elimizdiń táýelsizdik alǵan jyldarynan beri damyp keledi, – dedi Qazaqstan Prezıdenti.
Nursultan Nazarbaev Italııanyń Eýropalyq Odaqqa aldaǵy tóraǵalyǵyna Qazaqstan úlken úmit artatynyn, óıtkeni, bizdiń el onymen keń kólemdegi seriktestik týraly kelisimge qol qoıýǵa daıyndalyp jatqanyn atap ótti. Sondaı-aq, Qazaqstan Prezıdenti burynnan «Enı Grýpp» kompanııasy Qashaǵan ken ornynda jumys istep kele jatqanyn, bolashaqta da bul kompanııanyń jumysy jemisti bola beretinine senimdi ekenin, buǵan qosa, Italııa qazaqstandyq munaıdy eń kóp tutynýshy elderdiń sanatyna jatatynyn aıtty.
– Sizdiń Qazaqstanǵa jasaǵan saparyńyz Italııanyń bizdiń elimizge degen dostyq jáne áriptestik nıetiniń bir kórinisi bolyp otyr. Sondyqtan, biz bolashaqta da ekijaqty áriptestigimizdi damyta beremiz dep oılaımyn, – dedi sóziniń sońynda Memleket basshysy N.Nazarbaev.
О́z kezeginde M.Rensı Qazaqstan tarapyna ózderine kórsetken qonaqjaılyǵy úshin alǵysyn bildire kele, Qazaqstannyń ıtalııalyq kompanııalardy qoldap kele jatqany úshin rızashylyǵyn jetkizdi jáne elimizdi aldaǵy ýaqytta EKSPO halyqaralyq kórmesin ótkizetindigimen quttyqtady.
Italııa Premer-mınıstri qazaqstandyq ekonomıka úshin «Enı» kompanııasynyń ınvestısııalary mańyzdy mánge ıe ekendigine toqtaldy jáne ıtalııalyq «Fıat», «Italchımentı» jáne «Fınmekkanıka» kompanııalary Qazaqstanmen yntymaqtastyqty damytatynyna úmittenetinin jetkizdi. «Meniń Italııa Premer-mınıstri qyzmetin atqarǵanyma júz kún boldy. Sondyqtan, men ekijaqty baılanystardyń damýyna óz tarapymnan úles qosqym keledi. Qazaqstan men Italııa arasyndaǵy yntymaqtastyq ýaqyt óte kele qazirgi kezdegiden de nyǵaıa túsetinine senimdimin. Men Sizben Astanada áli de kezdesemiz dep oılaımyn. Bul kezdesý Italııadan bıznesmender kelgen kezde budan da úlken pishinde júzege asatyny anyq», dedi Italııa Premer-mınıstri.
Biz búgin munaı salasy boıynsha óte mańyzdy qujattarǵa qol qoıdyq. Qazaqstan – basqa da tabıǵı resýrstarǵa óte baı el. Bolashaqta basqa salalar boıynsha da áriptestik ornatyp qos memleket arasyndaǵy yqpaldastyqty jandandyra beretin bolamyz, – dedi jyly júzdi júzdesýdiń sońynda Qazaqstan basshysy N.Nazarbaev.
Sýretterdi túsirgender
S.BONDARENKO, B.OTARBAEV.