Klýb basshylyǵy men jattyqtyrýshylar shtaby jartylaı qorǵaýshy Ashat Taǵybergenge klýbqa qosqan eńbegi úshin alǵys bildirdi, dep habarlaıdy Egemen.kz fýtbol klýbynyń baspasóz qyzmetine silteme jasap.
«Fýtbolshy kelisim-shart merziminiń aıaqtalýyna baılanysty basqa komandaǵa aýysady. Byltyr Ashat komandanyń naǵyz úzdik oıynshysy boldy. Jartylaı qorǵaýshynyń sheber is-qımyldary arqyly sary-jasyldardyń oıyny júrdi, al onyń alystan baǵyttaıtyn soqqylary árdaıym sátti ótetin», delingen klýbtyń baspasóz qyzmeti taratqan habarlamada.
Ashat Taǵybergen «Tobyl» sapynda 76 matchta oınap, 16 gol soqty. «Tobylmen» birge ol chempıonattyń eki medalin jeńip, Olimpbet-Sýperkýbogynyń eki márte ıegeri atandy.
Aıta keteıik, endi Ashat Taǵybergen Shymkenttik «Ordabasy» klýbyna aýysady.