Júrgizýshilerge ses bolatyn «Sergek»

Sóıtken «Sergek» Taraz qalasynda 16 qańtar kúni res­mı túrde iske qosyldy. Appa­rattyq baǵdarlamalyq keshen iske qosylǵan alǵashqy kún­niń ózinde qazynaǵa 2 mln teńge túsirgen.

Elimizdegi aılyq tabysy az qalanyń turǵyndary qaltaǵa qol salǵan, qol salǵanda mol salǵan beınebaqylaý júıesi júıkemizdi juqartty degendi alǵa tartyp otyr. Al polısııa departamentindegi jaýapty mamandardyń jurt nazyna qatysty óz aıtary bar.

«Oblystyq polısııa de­par­tamenti testtik rejimniń aıaqtalýyna baılanysty 2023 jyldyń 16 qańtarynan bastap oblys ortalyǵynda «Sergek» qoǵamdyq jáne jol qaýipsizdigi júıesi iske qosylǵanyn habarlaıdy. Búginde 48 apparattyq baǵdarlamalyq keshen (35-i – jelilik ýchaskede jáne 13-i – qıylystarda) qalanyń jol qaýipsizdigin qamtamasyz etedi.

Júıe jyldamdyqty asyrý, baǵdarshamnyń tyıym salǵan belgisine ótip ketý, jol belgilerin saqtamaý (toqtaý syzyǵyn basý, qıylystyń aldynda durys oryn aýystyrmaý, tyıym salynǵan jerde toqtaý jáne turaqtaý) se­kil­di jol erejeleriniń buzy­lýyn tirkeıdi. Tájirıbe kórsetkendeı, jol-kólik apattary kóbinese júrgizýshilerdiń jyldamdyqty shamadan tys asyrý, baǵdar­shamǵa toqtamaý, jol qıyly­synan durys ótpeý saldary­nan bolady. Osy oraıda «Sergek» ıntellektýaldy qoǵamdyq já­ne jol qaýipsizdigi júıesi avto­kólik apaty saldarynan jaraqat alý jáne ólim kórset­kishterin azaıtýǵa, apattardy aldyn alatyn negizgi jol erejelerin saqtaýǵa kózdelgen júıe ekenin atap ótken jón», deıdi oblystyq polısııa departamenti ákimshilik polısııa basqarmasynyń ókili Nursultan Álishev.

Astanada joba iske qo­syl­ǵan birinshi jyldyń ózin­de jol-kólik oqıǵasynan qaza bolǵandar sany 43%-ǵa deıin azaıǵan eken. Almatyda 2019-2022 jyldary qaıtys bolǵan­dar sany eki esege tómen­degen. Shymkentte de jaǵdaı ózgergen.

«Júıeni ornatýdaǵy basty maqsat – Taraz qalasyndaǵy qaýipsizdikti kúsheıtý. Bul avto­kólik júrgizýshilerdiń sanasyn ózgertip, kólik júrgizý má­denıetin qalyptastyrýǵa yqpal etedi», deıdi Nursultan Álishev.

Ákimshilik polısııa bólim basshysy N.Álishevtiń aıtýynsha, jol qozǵalysy ere­je­lerin buzý derekterin tir­keý avtomattyq rejimde júr­gizilip, bul máli­metter po­lı­sııa qyzmetkeri tek­sergen­­­nen keıin quqyq bu­zý­­­shy­­ǵa jibe­riledi. «Barlyq ere­­je buzý jaǵdaılary Bas prokýra­tý­ra­nyń quqyqtyq statıs­tı­ka jáne arnaıy esepke alý komıtetiniń ákimshilik óndiristerdiń biryń­ǵaı tizili­minde avtomatty túrde tirkeledi. Hattamalardy ESQ kómegimen erap-public.kgp.kz jáne egov.kz saıttarynan, sondaı-aq Kaspı bank­tiń mobıldi qosym­shasyn­daǵy memlekettik qyz­metter bóliminde júkteýge bolady. Al eger qala turǵyny appa­rat­tyq-baǵdarlamalyq ke­shen­­de tirkelgen quqyq buzý­shy­lyqtarmen kelispese, nus­qa­mada kórsetilgen telefon nó­mirine qońyraý shalady», deı­di N.Álishev.

Áıtkenmen, apparattyq baǵ­darlamalyq keshenniń qosyl­ǵanyna narazylar da az emes. Olar jergilikti halyqtyń taby­synyń azdyǵyn alǵa tartyp, aıyppul tóleýdiń qıyndyǵyn aıtyp otyr. Aıtýlarynsha, áleýmettik teńsizdik onsyz da qos búıirden qysqan shaqta «Sergekten» kelgen aıyppuldy tóleý ońaıǵa soqpaıdy.

«Qalada «Sergek» apparat­tyq keshenin ár jerge bir ornalastyryp jatyr. Jambyl halqynyń basym bóligi 60-80 myń teńge kóleminde ǵana ja­la­qy alady. Soǵan qaramastan tabysymyz Astanadaǵydaı dep oılap, atalǵan baqylaý júıesin qosyp jatyr. Keshen arqyly bir táýlikte 2 mln teń­ge aıyppul jınalypty. Qala­da taksı bolyp áýpirimdep nápaqa taýyp, kúnin áreń kórip júr­gender bar. Olar qalaı aıyppul tólemek?» deıdi Taraz qalasynyń turǵyny Kúmisbek Ońlabaev óz oıymen bólisip.

Jergilikti kólik júrgizý­shi­ler aýyl-aımaqtan keletin týystary qalany durys bil­meıtindikten «Sergek» appa­rattyq baǵdarlamalyq keshe­nin áli talaı ýaqyt boıy aıyp­pulmen jarylqaıtynyn aıtyp kúıinip otyr. Áıtkenmen, beınebaqylaý júıesi resmı túrde iske qosyldy. Endi kólik júrgizýshiler saýysqandaı saq bolmasa, aıyppul tólegeni tó­legen. О́ıtkeni qalanyń 48 je­rinde ornalasqan beıne­baqylaý júıesi árbir zańsyz­dyqty qalt jibermeıdi.

Jambyl oblysy