Brazılııada ótip jatqan álem chempıonatyndaǵy keshegi kúnniń basty jańalyǵy jahan jeńimpazy – Ispanııa quramasynyń merziminen buryn jarys jolynan shyǵyp qalyp, óziniń ókilettigin erte ótkizetini boldy. Chılı fýtbolshylarymen tańmen talasa aıaqtaǵan bul kezdesýinde ıspan atletteri qarsylastary aldynda dármensizdik kórsetti. Al budan sál buryn Gollandııa quramasy Avstralııadan utylyp turyp, jeńisti tartyp áketti. Eń sońynan alańǵa shyqqan Horvatııa men Kamerýnnyń tartysynda bulardyń aldyńǵylary iri eseppen jeńiske jetti.
Biz osy úsh matchqa qatysty sholýymyzdy Ispanııa – Chılı arasyndaǵy matchtan bastaǵymyz kelip otyr. Birinshi oıynynda Gollandııadan 1:5 esebimen oısyraı utylǵan «qyzyl fýrııa» bul kezdesýde sol joly alǵan aýyr soqqydan áli esin jınaı almaı júrgen adamnyń keıpin kórsetti. Ol quddy bir aldyńǵy ushyrasýǵa bar kúsh-qýatyn sarqa jumsap qoıǵandaı áser qaldyrdy. Buǵan qaraǵanda, chılılikter keskekti kúreske birshama daıyn bolyp shyqty. Olar ıspandardyń burynǵydaı dopty erkin meńgerýlerine jol bermedi, bul úshin pressıngti qatty paıdalandy, aýmaqtardyń bárin jaýyp tastap, qarsylasyn óz mánerimen oınaýǵa májbúr etti. Alańdaǵy oqıǵanyń bulaı órbýine ıspannyń myqty degen fýtbolshylarynyń ózi kedergi keltire almady.
Chılılikter matchty óte belsendi bastasa, esesine ıspandyqtar ońdy-soldy qatelikter jiberýmen boldy. Solardyń birinde ıspandar alańnyń ortasynda kútpegen jerden doptan aıyryldy. Ony ile qashqan Chılı fýtbolshylary bir-birine tez qaqpaqyldap jetkize otyryp, qarsy aıyp alańynan bir-aq shyqty. Kombınasııany bastaǵan Vıdal edi, jalǵastyrǵan Charlz Arangıs pen Vargas boldy. Bulardyń sońǵysy áriptesi bergen dopty qaqpashy Iker Kasılıastyń janynan qaqpaǵa tastaı saldy – 1:0! Al taımnyń sońynda Alonso óz alańy mańynda tártip buzdy. Oǵan belgilengen aıyp dobyn Aleksıs Sanches «qabyrǵalyqtan» asyra urdy. Týralaı barǵan dopty Kasılıas keri qaıtaryp úlgerdi. Biraq dop Arangıstiń aıaǵyna baryp tura qaldy. Jaǵdaıdy tez paıymdaǵan Charlz dopty kidirmesten qaqpaǵa qaıtadan baǵyttady. Gol! Osymen esep 2:0-ge jetti.
Maýsymnyń 19-yna qaraǵan túni Avstralııa jáne Gollandııa quramalary kezdesti. Oıyn 3:2 esebimen «Qyzǵaldaqtar eli» fýtbolshylarynyń paıdasyna sheshildi. Áıtkenmen, jeńis ońaılyqpen kelgen joq. Kezdesý kezinde, tipti, utylyp ta qala jazdady. Eki jaq alǵashqy goldaryn bir-birlerimen jarysa soqty. Aldymen gollandııalyq Aren Robben 20-mınýtta esep ashsa, 21-mınýtta Tım Kehıll tarazy basyn teńestirdi. Ekinshi taımnyń basy endi gollandtardyń gol jiberip alýlarymen órnekteldi. Ol 54-mınýtta qaptaldan avstralııalyq Olıver Bozanıch tastaǵan dopty Derıl Iаnmat qolymen ustap alýyna baılanysty belgilengen penaltıden soǵyldy. Ony Mıle Edınak qatty uryp túsirdi. Alaıda, bul dúrligisti Gollandııa oıynshylary tez basa bildi. Arada bar-joǵy 4 mınýt ótkende, Van Persı ofsaıd sheginde turǵan sátinde qaqpaǵa kókteı ótip, gol saldy – 2:2! Onyń áriptesi Memfıs Depaı 68-mınýtta qarsy shabýyl kezinde úshinshi goldy túsirip, komandanyń jeńisin qamtamasyz etti.
Eń sońynan Kamerýn men Horvatııa kúsh synasty. Áý bastan kvartettegi aýtsaıder sanalǵan «qara qurlyq» ókilderi sol boljamnyń beker emes ekenin birden bildirip, týrnırdiń ekinshi matchynan keıin-aq pleı-off shaıqastaryna shyǵý quqyǵynan aıyryldy. Alǵashqy gol soǵylǵan kombınasııany Darıo Srnadan dop alǵan Marıo Mandjýkıch bastady. Ol dopty kelesi kezekti Ivan Perıshıchke asyrdy. Odan pas alǵan Ivısa Olıch bar kúshimen soǵyp, qaqpanyń toryn dúr etkizdi. Kamerýn qaqpasy toryn búlk etkizgen ekinshi dop ekinshi taımnyń bastalǵan shaǵynda salyndy. Ol dopty qarsylastar shabýylshysynyń aldyna laqtyryp tastaǵan qaqpashy Itandjdyń qateliginen keıin múmkin boldy. Ony alǵan Perıshıch birden tórt baǵannyń ortasyn kózdeýge asyqpady. Ol birneshe qadam ilgeri kelip, ózine qolaıly sát jasap baryp, dopty qaqpashynyń janynan zý etkizdi. Taǵy bir shabýyl tusynda Danıel Pranıch ózi qol jetkizgen buryshtama dobyn alańǵa ózi jetkizdi. Ol Mandjýkıchtiń basyna týralap keldi. Sol kezde «Bavarııanyń» shabýylshysy bul múmkindikti qur jibermedi. Arada 12 mınýt ótkende bul forvard taǵy bir gol soǵyp, chempıonatta dýbl jasaýshylar qataryn túzdi.
Keshe chempıonatta Kolýmbııa – Kot-d`Ivýar, Ýrýgvaı – Anglııa kezdesti. Al búgin tań aldynda Japonııa men Grekııa ushyrasty.
Serik PIRNAZAR,
«Egemen Qazaqstan».